Castañón: “Tamos arguyosos d'enseñar aspectos d’Asturies per bona parte d'Europa”

Berto M.Castañón (Avilés, 1976) lleva venceyáu a la música del país dende neñu. Ente otros, tuvo nel grupu baille Escontra’l Raigañu y n'Asturtralla. Anguaño canta en Skontra, banda cola qu’acaba de llegar d’una xira per Alemania y Holanda.

Tais acabantes de llegar de la vuestra segunda xira per Holanda y Alemania, pero enantes de too ¿Cómo foi posible esta serie de conciertos? Son coses que nun se suelen dar en grupos asturianos de les vuestres característiques…
Llegamos ayeri mesmu de viaxe... La verdá que bien cansaos pero mui contentos y yá pensando en futuros proyectos d'esti tipu. Esta segunda xira foi posible sobremanera pol interés de los nuesos hermanos holandeses de la banda folk-punk Circle J y de dellos booking europeos colos que trabayen. Tamién collaboraron otres bandes como’l grupu alemán Raptus.

Pa facelo posible pela nuesa parte, dempués d’organizanos con temes vacacionales, punximos en contactu con ellos y empezó el trabayu... Ente seis y ocho meses pa entamar una xira d'esti calter. Lo principal que fai falta son les ganes y la ilusión d'embarcase n'esperiencies asina, y como siempre, munches ganes de currar. La primer vegada foi inolvidable, pero esta segunda creemos que se superó...

Fixisteis per dos selmanes d’embaxadores de la llingua, cultura y música d’Asturies per Europa ¿Cómo se recibieron estes señes d’indentidá ente’l públicu d’esos países?
La verdá que perbién. La xente quédase mui sorprendida de cómo pueden entemecese instrumentos y melodíes tradicionales con ritmos rápidos y rabiosos... Col tema de la llingua siempre tratamos d'esplicar que gran parte de los nuesos temes tán compuestos en llingua asturiana y de la problemática qu'existe n’Asturies cola non reconocencia que se merez. En tolos sitios atopes xente que te pregunta y s’interesa pela to tierra y la to cultura. Tamos bien arguyosos d'enseñar una parte d’Asturies per bona parte d'Europa.

Colos pies otra vuelta n’Asturies ¿Pues facer un balance xeneral d’esta xira?
Creo que nun diría nenguna mentira si dixera qu'espectacular. Amás de los miembros de Skontra, fuimos en total de 10 persones al viaxe, y creo que puedo falar en nome de toos si digo que volvimos encantaos col resultáu. Non solo polos shows que tuvieron mui bona respuesta, sinón sobremanera pol tratu recibíu y l'intercambiu d'esperiencies. Conocimos un montón de xente, un montón de sitios y vivimos un montón d'anécdotes que faen qu'esti tipu de xires sían inolvidables.

Por comparar ¿Qué señalaríes de les diferencies en cuantes a infraestructures, públicu, tratu a los músicos…?
Davezu fálase mui bien de cómo tán estos aspectos fuera del Estáu...Hai munches diferencies... Por citar dalguna, la xente ta acostumada a pagar entrada por entrar a un conciertu y, non solo eso, sinón qu'hai xente que llega al garitu onde ye la actuación y, anque nun sepa nin qu'hai conciertu, paga la entrada pa tar per ehí un ratu tomándo daqué y escuchando música en directo.

Tamién na mayoría de los sitios te ponen bon equipu de soníu, con técnicos, pruebes de soníu... (equí na mayoría de los llugares de medianu aforu tienes que llevar el to propiu equipu de soníu). El tema de poner comida y bebida gratis a la xente de los grupos... (pues imaxinate lo que pasa na gran parte de los sitios equí...). El tratu ye distintu dafechu.

¿Por qué crees que na nuestra situación nun lleguemos a esi puntu tovía?
Equí munches vegaes paez que te faen un favor dexándote tocar nun sitiu y nun se dan cuenta de que pa qu’una banda llegue a tocar hai muncho trabayu detrás. Nun falo de condiciones económiques namás; falo de condiciones d'infraestructura. Por exemplu, na mayoría de los sitios nos que tocamos nestes xires europees tienes equipu de soníu con técnicu, dante la cena, pónente un backstage con bébora, dante agospiu... Equí ye casique impensable. Ye una cuestión de cultura musical y de consideración pa colos grupos. N’Asturies tienes que xugar en “primer división” pa consiguir bones condiciones, sinón la mayor parte de la vegaes casi tienes que pagar pa poder tocar.

¿Yes optimista nesti sen con vistes al futuru?
Ye un cambiu de mentalidá y de cultura; y eso siempre ye difícil d’algamar... Equí cada vez hai más xente entamando conciertos y dando meyor infraestructura a les bandes... Pasu ente pasu esperemos que vaya camudando la manera de furrular.

Centrémonos agora nel vuestru nuevu discu “Mazcando miseries” qu’entamará esta selmana a vendese n’Asturies ¿A mou xeneral qué se va topar nél?
La xente va atopase mucho punk, mucho rock, melodíes pegadices, lletres reivindicatives y muncha caña. Tou esto con un soníu bien bonu. Amás van poder ver un llibretu espectacular, fechu pol gaiteru de la banda, Zapico. Esperemos que’l resultáu sía del gustu de la mayoría.

El soníu ye más folk y los cantares vuelven a tar más na onda musical de “Semeya de la rabia” ¿Por qué esti cambiu?
Nun creo qu'haiga nengún cambiu; más bien ye una continuación. Siempre tratamos de facer en tou momentu lo que nos apetez y da-y la forma que creemos. Depués a la xente éntren-y meyor o peor unes temes o otros... En tolos discos hai temes con toques más folkis, con pingarates de hardcore, con daqué de ska... Ye un pocu más de lo mesmo. Lo de que'l soníu sía un pocu más folk, pue venir pol usu de instrumentos como'l bouzouki o el curdión, que-y dan un toque más melódicu a delles temes...

La mayor diferencia ente esti tercer trabayu y el segundu, ye’l estudiu de grabación y la producción. Volvimos a los estudios Tutu de Corvera de la mano de Sergio Rodríguez, que foi onde grabamos el “Semeya de la rabia”. Creo qu'eso se nota. Quedemos bien contentos col trabayu que fiximos nel estudiu y col que fixeron Sergio y Ruboh. Pa nós tien un soníu espectacular.

Tamién volvéis a facer adaptaciones de pieces tradicionales asturianes…
En “Mazcando miseries” facemos una adaptación vocal en “Santana”. Siempre usemos adaptaciones de pieces tradicionales... por exemplu en “Unidá” empleguemos nel so día una “muliñeira”, tamién en “Escontra”, en “Que feliz soi”... Hai un montón de temes nos nuesos discos que lleven melodíes tradicionales.

En 2011 cumplís diez años como grupu ¿Hai yá dalguna idea en mente pa celebrar esti cumpleaños?
Pel momentu tenemos pensáu presentar el nuevu trabayu n’Asturies nun conciertu especial que vamos entamar a preparar a primeros d'añu. Ye ciertu qu'en 2011 cumplimos diez años como banda, pero nun sabemos si vamos facer una celebración especial o vamos esperar al 2012 que van ser los 10 años del primer conciertu de Skontra. Pue que sía una meyor fecha pa recordar.

Son diez años tamién d’autoxestión y d’editar discos ensin subvenciones. Paez que tenéis estos principios mui claros…
Ye una cuestión de principios desque nació'l grupu. Creemos na autoxestión, somos conscientes de que ye más limitáu y de que'l trabayu ye mucho mayor, pero compénsanos... En tou esti tiempu que llevamos furrulando fuimos meyorando pocu a pocu y aprendimos a organizanos cada vez meyor. Tamos bien arguyosos d'esta forma de funcionar independiente, ensin presiones (más allá de les propies), autoxestionando nueses grabaciones y ediciones... Nun queremos depender de nengún tipu de subvención gubernamental  a la hora d'encarar nuevos trabayos; creemos qu'eso diría escontra la nuesa filosofía de trabayu y de la nuesa coherencia como banda.

Pa dir acabando, lleves bien de tiempu nel mundu de la música asturiana. De los años nos que tocabes n’Asturtralla a agora ¿Qué coses fueron pa peor y pa meyor?
Les coses camuden lóxicamente. Agora hai más medios pa tou, sobremanera técnicos. Pero por exemplu, una cosa que comentamos delles vegaes ente miembros del grupu que fueron a peor, ye que va años había bastantes más sitios pa tocar y pue qu’en comparanza les condiciones económiques y el tratu recibíu pola xente qu'entamaba los conciertos yera bastante meyor qu'agora...

Per esi tiempu (principios de los 90) el sofitu institucional a la música n'Asturies centrábase prácticamente nel mundu del folk más tradicional, dexando de llau bona parte d'otros estilos musicales... Entamábense munches nueches folk o “celtes”, nes que se movíen grandes cantidaes de dineru... Tou eso paez que ta camudando. Anque sinceramente, nin naquella época con Asturtralla como agora en Skontra son coses que nos afectaren mucho.

2009 y 2010 foron bonos años pal rock astur en cuantes a producción discográfica. Yá hai un garrapiellu grupos y cierta estabilidá, pero como cantante d’un grupu enmarcáu nesta etiqueta musical ¿Qué crees que tien qu’algamar esti movimientu con vistes al futuru?
Ye bien bonu pa toos que se consolide un bon panorama musical n´Asturies. Hai un montón de grupos que sacaron nuevos trabayos y de muncha calidá, qu'engarren por salir alantre. Sicasí, sigue faltando una infraestructura na que poder consolidar esti movimientu: locales d'ensayu, sitios onde poder tocar... Pero pesie a toles torgues ye bien prestoso ver como la xente sigue alantre, con muncho trabayu y esfuerzu.

Hai que siguir buscando distintes iniciatives y alternatives pa poder consolidar un panorama musical asturianu fuerte. La creación de nueves productores qu'apuesten polos nuevos grupos ye una mui bona noticia pa tolos que formamos d'una o otra forma parte del panorama musical n'Asturies. Cuantes más iniciatives meyor pa toos.