Carlos Rubiera: “Munchos asturianistes entendimos que FAC yera una oportunidá única”

José Carlos Rubiera Tuya (Cabueñes, 1956) ye dende mediaos de xunu conceyal d’Educación, Cultura, Mocedá y Festexos del Conceyu de Xixón. El cantante y escritor faló con Asturies.com de la so nueva esperiencia política.

¿Qué balance fai d'estos más de 100 díes al frente d’una conceyalía de tantu pesu?
 
La sensación que tengo, y la esperiencia nestos más de 100 díes, ye qu’ésti ye l’esfuerciu inteleutual más grande que fixi en tola mio vida, quitando cuando preparé oposiciones en dos meses tando trabayando al mesmu tiempu y con familia. Básicamente ye eso, un esfuerciu inteleutual inmensu p’asimilar una cantidá tremenda d’información, lleer cientos d’informes y d’espedientes, y dir teniendo na cabeza tolo que son les faces de xestión d’esta conceyalía.
 
¿Esi esfuerciu obliga a trabayar a trés turnos?
 
Yo toi faciendo aproximadamente unes 50 hores selmanales de trabayu, porque el trabayu nun ye solo de despachu; tamién ye asistir a munches coses –y otres munches a les que nun puedo asistir–, y ye llevar pa casa informes pa lleer pela nueche. Nun sé si quedaré cortu con 50 hores selmanales.
 
La de Cultura ye una conceyalía con muncha visibilidá…
 
Sí, ye una conceyalía mui mediática porque tas siempre teniendo que ver con actos culturales y festivos que tienen muncho escaparate. Eso nun quier dicir que sía más importante qu’otres conceyalíes, pero sí ye más mediática, más visible.
 
¿Ta cómodu nel cargu?
 
Si por cómodu s’entiénde si trabayu a gustu col equipu de gobiernu, sí completamente; si por cómodu s’entiénde que me siento arropáu, nesti casu por Xosé Nel, como direutor de la Fundación de Cultura, y polos funcionarios que tengo direutamente al mio cargu y clolaborando conmigo, tamién. Non sólo cómodu, sinón mui satisfechu y contentu de cómo tán funcionando les coses. Otra cosa ye la comodidá personal, yá qu’esti nun ye un cargu cómodu porque toi llevando una conceyalía que llevaben ente tres conceyales y ye trabayoso.
 
¿Cómo foi la herencia que recibió del equipu de gobiernu pasáu?
 
Home, topáronse problemes bastantes serios sobre too nel área de xestión de festexos. Lo que ye la empresa municipal Teatru Xovellanos taba nuna situación mui mala económicamente y eso supón partir con un pesu enriba. Nun tienes les manes llibres pa poner en marcha programes que te gustaríen poner, porque lo qu’hai que facer ye arreglar les cuentes, y iguales significa nun tirar voladores. Ye tolo contrario: aforrar, midir, mirar mui bien en qué se gasten les perres, cómo, cuándo y con qué oxetivos.
 
Na Fundación Municipal de Cultura la situación ye diferente. Alministrativamente funciona mui bien, y eso ye méritu del personal. Tamién hai munchos programes nos que tampoco hai muncho qué facer escepto garantizar que sigan en marcha aquellos que tienen interés. Y después, ye verdá que, precisamente porque ye una fundación que funciona bien, tenemos el problema de que cuando quies poner en marcha programes propios, o quites per otru llau o realmente nun tienes disponibilidaes de presupuestu pa sacales alantre. Entós ésa ye la gran dificultá nesti momentu: yo tengo nel programa eleutoral delles coses que ye compromisu poneles en marcha, pero’l problema ye ver cómo s’encaxen alministrativamente y, sobre too, presupuestariamente.
 
¿Por qué escoyó’l perfil de Xosé Nel Riesgo como direutor de la Fundación Municipal de Cultura?
 
Ye evidente que, anque pudiera haber –y dafechu presentáronse dalgunes otres persones– con un perfil mui interesante pal cargu, Xosé Nel abarca práuticamente na so formación y na so esperiencia profesional tolos ámbitos de xestión que son propios d’esta conceyalía: dende l’arqueoloxía y el patrimoniu históricu a la xestión de desarrollu llocal y xestiones que tienen que ver coles aplicaciones económiques, por dicilo asina, de l’actividá cultural. Xosé Nel, amás, ye un home con una inequívoca trayeutoria de querencia de lo propio dende la so militancia nel asturianismu cultural, pero tamién dende la so esperiencia profesional en programes de desendolcu rural en dellos conceyos d’Asturies. Creo que’l perfil de Xosé Nel yera absolutamente perfechu y qu’encaxa como un guante a la mano. Toi mui contentu de tenelu conmigo trabayando.
 
La presencia de persones procedentes del asturianismu cultural en cargos de pesu tres la entrada de FAC nes instituciones ta creando munches espectatives.
 
Ye una gran peligru que l’asturianismu cultural tea colos güeyos puestos en nosotros esperando que faigamos milagros porque los milagros facíalos Xesucristu y tal vez dalgún santu más. Hai que tener en cuenta que cuando faeste cargu d’un área de xestión municipal, escontra de lo que se pue pensar dende fuera, nun tienes les manes llibres pa facer al to antoxu. Hai unos procedimientos, unos pasos alministrativos mui concretos, unes instituciones que yá tan funcionando y que sería un disparate poneles pates p’arriba de la nueche a la mañana. Nesi sen, cabe la posibilidá de que muncha xente se sienta mui decepcionada, xente que pudiere esperar que díbamos facer grandísimes coses en pocu tiempu y eso nun se pue facer; nin nosotros ni naide, salvo nuna situación de revolución, por dicilo asina, pero nun ye’l casu. Tamos nun relevu democráticu y, polo tanto, les instituciones tienen un funcionamientu regláu que nun puedes obviar.
 
¿Si va notase? Verémoslo col tiempu. Lo que sí ta claro ye que’l compromisu de mio como conceyal del equipu de gobiernu del Foru Asturies ye sacar alantre un programa eleutoral, que ta escritu y ye públicu. Dafechu yá hai unes cuantes coses del nuestru programa que tamos poniendo en marcha. Veráse col tiempu lo que da de sí y les posibilidaes reales que tenemos de facelo. Hai que tener en cuenta que vamos pa malos tiempos, tiempos nos que tamos xugando con presupuestos que van mermar sensiblemente en rellación a lo qu’había. Entós eso ye una dificultá añadida, claro.
 
¿Van ser tiempos meyores pa la llingua asturiana?
 
Nel tema del asturianu yo siempre dixi que nun diba pasar el carru per delentre los gües. La proteición de la nuestra llingua ye una competencia esclusiva del Principáu d’Asturies y, polo tanto, voi tar mui atentu a les llinies polítiques y práutiques que desendolquen dende’l Gobiernu. Naturalmente, too aquello que vaya diciendo’l conseyeru de Cultura, el propiu presidente o voceros autorizaos en rellación a la política llingüística, vamos recoyelo con total fidelidá y collaboraremos dende l’Ayuntamientu a que se ponga en práutica.
 
Personalmente, toi convencíu de qu’a peor nun vamos dir. Siempre pensé asina porque yo tuve la mio parte cuando se sacó alantre la Llei d’Usu y Promoción del Asturianu, yá que naquel momentu formaba parte de la Executiva Nacional del PAS. En consecuencia, siempre diximos naquel momentu que yera lo más que se podía algamar y criticósenos munchísimo dende ciertos ámbitos del asturianismu d’izquierdes, pero lo cierto ye que los 12 años que pasaron demostraron que, efeutivamente, yera lo más que se podía conseguir; y los que nos criticaron nun algamaron nada más, tolo contrario. Lo que se fixo foi, dende los gobiernos d’Areces, incumplir sistemáticamente esa llei. Perdiéronse 12 años por esa política de saltase la llei y, si l’equipu nuevu del Gobiernu del Principáu, y en consecuencia los ayuntamientos al rebufu d’esa política del Principáu, fai que se cumpla ensin restricciones la Llei d’Usu y Promoción del Asturianu, los avances van a esistir. Eso ye clarísimo.
 
Tornando a la so trayeutoria política, ¿cómo surde la posibilidá d’incorporase a FAC?
 
Esto ye como si tas dando una vuelta pela playa y vien una folona; de repente t’engancha, gárreste a una tabla de surf y emburriate la fola. Cuando te das cuenta, tas enriba de la Pescadería Municipal… (rises). Ye una cosa qu’ocurre d’una manera un tanto casual. Hai, nun momentu determináu, un alcuentru con Isidro Martínez Oblanca, que nesi momentu, tres la fundación del partíu, taba xugando un papel importante na puesta en marcha de lo que yera’l mecanismu de concurrir a les eleiciones, nel qu’hai un intercambiu d’opiniones. Quedamos en volver a venos, falamos, y ofrezco-y la mio collaboración como ciudadanu del ámbitu de la cultura asturiana…
 
Yo taba siguiendo con muncho interés lo que diba diciendo públicamente’l señor Álvarez-Cascos y albidraba que s’abría una posibilidá de que surdiere, efeutivamente, un movimientu, un partíu políticu qu’amás fuese un movimientu social que tuviese una mayor capacidá de comprender el país. El fechu de qu’Álvarez-Cascos utilizare con cierta frecuencia la pallabra país pa referise a Asturies significaba que detrás d’eso había un pensamientu, como creo que se ta confirmando, un proyectu políticu, polo qu’ofrecí, como ciudadanu, la mio collaboración. Posteriormente, llamáronme a una reunión y propusiéronme formar parte de la candidatura municipal. De mano, dudélo, pero depués acepté porque, francamente, nun pensaba que díbamos tener qu’asumir responsabilidaes de gobiernu. Una vez qu’ocurrió lo qu’ocurrió, naturalmente nun hai marcha atrás. Nun ye la de mio nesti momentu una situación de tar de conceyal de Cultura del equipu de gobiernu del Ayuntamientu por ambición política, sinón por una circunstancia qu’ocurre y con una voluntá de serviciu, d’aportar, per un llau, a una renovación de la política asturiana, y, per otru llau, no que modestamente pueda, un pasu p’alantre pa lo que ye l’asturianismu cultural y políticu.
 
En FAC entró, amás de vusté, otros asturianistes bien conocíos como Inaciu Iglesias o Xicu Díaz Yepes, ente otros. ¿Ye Foro'l salvavides del asturianismu?
 
Nun sé si ye esa la metáfora. Lo que ye cierto ye qu’unos cuantos, bastantes más de los qu’asomamos nos periódicos, procedentes del asturianismu cultural, y inclusive políticu, tán en Foru Asturies ensin apaecer nos papeles. Bastante xente que tenemos una trayeutoria vital nel asturianismu cultural y políticu entendimos qu’esti movimientu, que ye social amás que políticu, yera una oportunidá que nun se podía desperdiciar. Mantenese siempre na marxinalidá social y política pue ser mui gratificante dende un puntu de vista utópicu, pero nun aporta gran cosa a la causa. Yo pienso que Foru Asturies ye un llugar, un sitiu, onde se pue trabayar… Ye, a día de güei, l’únicu sitiu onde se pue trabayar con eficacia pola causa, que supongo defendemos toos, de qu’Asturies recupere la so personalidá, el so pesu nel conxuntu del Estáu; que vuelva a tener consciencia de la so propia esistencia; que vuelva a valorar la so propia cultura, la so propia personalidá… Paezme que ye l’únicu sitiu onde se pue trabayar agora con una conciencia asturianista.
 
El saltu a Madrid del partíu crea duldes ente la ciudadanía sobre si esi asturianismu ye namás una cortina de fumu.
 
Non, tolo contrariu. El saltu a Madrid nun ye nengún saltu a Madrid. Dende cualquier discursu asturianista, dafechu dende’l PAS asina lo formulábamos siempre, nun sólo yera tar nes instituciones asturianes, sinón tener voz propia nes instituciones estatales y europees si se pudiere. El saltu a Madrid que plantega Foru nesti momentu, anque nun soi voceru acreditáu pa falar d’eso, ta claro que ye, como siempre calca’l presidente del Gobiernu, pa tener grupu parllamentariu propiu nes Cortes Xenerales y poder negociar asina de tu a tu col Gobiernu del Estáu aquelles cuestiones qu’interesen a los asturianos.
 
En xunetu del añu próximu va celebrase la primer edición del Festival Atlánticu de Xixón. ¿Ta avanzáu’l programa?
 
Sí, claro que ta avanzáu y pronto va dase a conocer un avance. El tema de les eleiciones del día 20 modficaron un poco los plazos previstos pero, si nun ye antes d’esa fecha será inmediatamente después, presentaremos un avance de lo que va ser la so programación, col esquema de trabayu que vamos entamar –mui novedosu, por cierto– y diciendo esactamente les feches. Tamos trabayando nello, tamos avanzando coses y nun plazu razonable presentaremos esi avance sobres les estayes que va abarcar el festival, que van ser una docena d’elles.
 
¿Va centralizase’l festival nun puntu de la ciudá o los barrios tamién van tener espacios?
 
Ésa ye una de les coses que comentaremos na presentación pública y, efeutivamente, vamos a intentar que’l festival nun tea nun solu sitiu, sinón que los barrios tengan próximo actividaes rellacionaes con esti certame, que van ser munches. Bien ye verdá qu’eso tamién ta condicionao polos espacios disponibles según pa qué coses. Ye relativamente fácil llevar actuaciones musicales a los barrios, porque hai centros culturales que tienen salones d’actos, pero depués hai otres actividaes que van ser propies del festival que tendrá que circunscribise al ámbitu propiu por razones d’equipamientu.
 
No que se refier a la política de festexos de Xixón, ¿va haber cambios?
 
Va haber un cambiu radical na manera de xestionar. Va xestionase con rigor presupuestariu. Lo que se taba faciendo na política de festexos yera una fuga hacia alantre absolutamente suicida que diba tener como consecuencia la estinción del propiu Teatru Xovellanos como empresa municipal que xestiona los festexos. Yo cuando me fago cargu de la conceyalía descubro con horror que’l Teatru Xovellanos taba en causa de disolución; el Teatru Xovellanos ye una empresa que nun xestiona namás el teatru del paséu de Begoña, sinón los festexos y el Festival de Cine, y tenía un déficit acumuláu tal que taba en quiebra técnica. ¿Y eso por qué? Porque se taba faciendo una xestión con mui pocu rigor económicu, de tira p’alantre, d’acumulo déficit pero nun importa porque después llamo a ‘papá’ Ayuntamientu pa que ponga perres cada añu.
 
Hai qu’aclarar a los ciudadanos que’l Teatru Xovellanos ye una empresa que ta suxeta a derechu mercantil, a lo que ye la llexislación propia de cualquier empresa, y que, cuando una empresa acumula un déficit que supere en muncho’l so propiu patrimonio, entra en causa de disolución; esto ye, tien que pesllar, facer el correspondiente espediente de regulación d’emplegu –mandar a los trabayadores pa casa– y entrar en concursu d’acreedores. Ésta ye la situación del Teatru Xovellanos cuando yo me fixi cargu y ésta yera tolos años la situación al final del exerciciu, lo que subsanaba con aportaciones estraordinaries del Ayuntamientu –más de 3 millones cada añu– pa cubrir déficit. Yera una xestión absolutamente irresponable.
 
Nesi sen, va haber un cambiu radical. Vamos a intentar cumplir el déficit presupuestáu peseta a peseta. Eso naturalmente implica que vamos trabayar con más d’un millón d’euros de presupuestu menos. Si somos capaces de mantener una programación en cantidá igual o asemeyada a la qu’había, y de suficiente calidá, ye que realmente tamos faciéndolo muncho meyor que los anteriores. Depués será opinable si les llinies de programación gusten más o gusten menos. Diremos viendo la rempuesta popular como otru de los indicadores a per ónde debemos tirar, a parte yá de les apuestes que pueden ser propies, la implicación del Teatru nel Festival del Arcu Atlánticu… Y sobre la marcha diremos aplicando aquello que tenemos nel programa como llinies de trabayu, que ye que’l Teatru Xovellanos tien que ser l’escaparate de l’actividá artística y cultural de la ciudá, y que queremos dar, en dalguna midida, sinón ventaxa, sí tar mui atentos a los artistes, a los grupos de teatru de la tierra, porque ellos son los que tán faciendo realmente día a día la cultura.