Cárcaba: “P’afrontar el Mac Crimmon ye clave la preparación del repertoriu, tocalu un millón de veces”

|
Fernando Vázquez Cárcaba

“El secretu a voces pa que les coses salgan bien en música –y na vida– ye ensayar, ensayar y ensayar”. Fernando Vázquez Cárcaba (Lieres, 1994) tien marcada a fueu esta máxima y gracies a la so constancia pudo ganar el Trophéee Mac Crimmon na pasada edición del Festival Interceltique de Lorient depués de raspialu en delles ocasiones.

¿Cómo recuerda aquella xornada n’An Oriant?

Siempre ye mui especial tar ellí, siénteste un privilexáu por poder representar a Asturies nun troféu tan importante y históricu. Sicasí, yera la sesta vez que participaba y ensin dulda les emociones llévesles d’otra manera, con más serenidá, tranquilu, sabiendo que lleves les coses preparaes y conoces el concursu.

¿Qué pieces preparó?

Nel repertoriu asturianu suelen tocase les mesmes pieces, cambiando dalgunes partes y dexando’l to propiu sellu. Personalmente gústame amosar trés coses diferentes, como se fai nel restu de repertorios de Galicia y Bretaña, tocando xota, saltón y floréu –too colos mios propios arreglos–. Como norma del concursu ha tocase en menos de 6 minutos, colo que tienes qu’abreviar y tocar dalguna parte, non entero.

En cuanto lo gallego, la mio opinión ye tocar daqué más cenciello –con cierta dificultad téunica–, pero consiguir da-y el soníu más paecíu al de les sos gaites y la so forma de tocar. Esti añu llevé una gaita preparada con dos roncones pa intentar facer los arreglos como ellos suelen preparar.

Per otru llau, el repertoriu bretón ye’l que más dificultá nos trae pol desconocimientu del mesmu. La esperiencia ye una bona collacia pa poder preparalo bien. Nel mio casu siempre me fixé nos conciertos que se faen en Lorient, los concursos de pareya de biniu y bombarda y los bagad. Munchos vídeos y tiempu d’escucha pa comprender cómo faen les coses ellí. Ye un mundu musical maraviyosu.

Yá quedara nuna ocasión a piques de ganar el Trophée Mac Crimmon.

Asina ye, nel 2019. La verdá que foi emocionante tar na llucha, al igual que me pasó nel 2018 y nel 2017. Tar a un puntu de ganar o inclusive, como’l casu del 2019, empatar, demuestra que tas ahí, compitiendo hasta’l final. Sí, perdisti y, como dalgunos, dicen “el segundu ye’l primeru de los perdedores”, sicasí sales reforzáu y arguyosu de lo que ficisti, sabiendo que l’añu qu’entra volverás a intentalo con más hores, más conocimientos sobre lo que gusta y lo que non, y, al final, tamién ta’l factor de la suerte, de gustar al xuráu d’esi añu. Tolos años cambia’l xuráu, lo que fai que dependa un poco del azar. Nel mio casu, toi muy argullosu de consiguir tar siempre na llucha pol premiu.

¿Cuáles sos les claves pa enfrentar un concursu d’esti tipu?

Esti añu, ensin dulda, foi’l que menos ensayé de toos, pero’l que más claro lo tenía. La preparación del repertoriu y machacalu tocándolu millones de veces. El secretu a voces pa que les coses salgan bien en música –y na vida– ye ensayar, ensayar y ensayar. Eses hores d’ensayu tan ehí, son munchos años tocando, 20 años en concreto faigo esti 2023. Dende’l 2015 participo nesti concursu y yá son muchos años compitiendo, ganando y perdiendo –que ye onde realmente se deprende–. Tou ello fai qu’esta vegada les sensaciones fueren tan bones, tocando y disfrutando nel escenariu.

Esti 2022 foi especial nel Interceltique por ser l’añu d’Asturies. ¿Cómo lo vivió?

La última vez que se celebró l’añu d’Asturies foi nel 2014. Esi añu quedé a les puertes de clasificame pa dir per primer vez y nun pudo ser. Ensin dulda foi mui especial poder vivir eso en Lorient, un llugar onde la cultura tradicional se vive con tanta pasión y arguyu. Sientes como Asturies ye la protagonista cada día del festival, con actos, conciertos y tol merchandising xirando al rodiu de nós.

¿Qué supón la presencia d’Asturies nesti festival?

Asturies nun dexa de ser un país celta más na numberosa llista que participa nel festival, pero como asturianu, supón una gran oportunidá sobre manera pa deprender. Deprender de cómo se vive n’otros países esa cultura, deprender de la xente y de la música que tresmiten. Equí ye muy difícil poder ver xente de 5 a 90 años baillando toos xuntos nuna fiesta, nin bandes de 40 o 50 músicos con bandes A, B y C. D’eso, ensin dulda, debemos deprender y munchu.

¿Cree qu’equí tien la repercusión que se merez?

El festival ganó muncho en repercusión mediática n’Asturies. El siguimientu mientres el festival de los periódicos y de la televisión foi constante. Va unos años yera un completu desconocíu pa la xente que nun taba metía nel mundín.

Per otru llau, ta la repercusión del concursu McCrimmon en sí, que quiciabes se ve cada añu más debilitáu pola falta de competitividá nos concursos asturianos. Menos xente participando y menos afición en xeneral.

Yá se conocen quiénes van ser los cuatro representantes asturianos d’esti 2023 nel Mac Crimmon (Nel Cortizo, Diego Lobo, Jaime Álvarez y Paula Gutiérrez). ¿Qué conseyu-yos daríes?

Tienen tiempu dende avientu, que se termina el concursu d’Uviéu, hasta lo primero d’agostu, que ye’l McCrimmon. El meyor conseyu que-yos puedo dar ye qu’aprovechen el tiempu tolo que puedan pa preparar el repertoriu y ensayalu. Dalgunos de los que van ye la primer vegada y eses hores d’ensayu van ser importantes pa ganar en confianza col repertoriu y cola gaita. Tolo qu’ensayes al final va demostrase nunos pocos minutos, colo que conocer el to propiu instrumentu y lo que toques ye fundamental.

Otru conseyu sería dar con alguien que tenga esperiencia nesti tipu de concursos pa que te pueda aconseyar. Facer les coses solu nun te fai meyor; la ayuda nel camín ye necesaria tamién pa medrar.

¿Cuáles son los aspeutos que más llamen l’atención en Bretaña de la gaita asturiana?

Sobre manera la versatilidá del propiu instrumentu. La gaita qu’utilicen ellí ye la escocesa, bien conocida pol so volume de soníu y el tamañu de la mesmu (un fuelle grande y trés roncones). Ye una gaita qu’orixinalmente ta pensada pa imponer nes guerres, y esa esencia sigue perdurando anguaño. Sicasí, la gaita asturiana a pesar de tener –dalgo– menos de soníu y menos presencia física, ye un instrumentu que te permite tocar acompañáu de munchos instrumentos y con un rexistru sonoru más ampliu.

¿Tien futuru l’instrumentu?

Too na vida tien altibaxos. La gaita asturiana taba embaxo hasta lo último de los 80 y surdió’l llamáu ‘boom de la gaita’. Viviéronse años de munchu ésitu pa la cultura tradicional asturiana y muncha xente supo aprovechar esi momentu, en tolos sentíos.

Agora vivimos un momentu mui diferente, con otres xeneraciones y otru mundu. La gaita dexó de ser protagonista y nun tien tantu llamamientu. Sicasí, como dicía pa empezar, too nesta vida son altibaxos y de xuru que la gaita y tolo que-y arrodia volverá a vivir meyores años. Too depende de nós, de la xente asturiana y los que podemos tar cerca de los xóvenes pa inculcalo dende bien pronto, como faen, por exemplu, en Bretaña. Ellí nun tienen altibaxos porque los instrumentos tradicionales y tola so cultura ta bien enraigonada.

¿Cuáles sos los planes que tien vusté con respeuto a la gaita?

Son munchos los proyeutos que ronden pela mio cabeza, pero toos necesiten de tiempu pa desendolcalo bien. Agora mesmo’l mio oxetivu principal ye empezar a trabayar como profesor de música nun colexu o institutu.

La gaita siempre será parte de min y ilusionaríame poder llegar a facer más coses con ella. De momento –y creo que pa tola vida yá– sigo col taller de gaita asturiana, qu’empecé a faceles nel 2018. Ye mui prestoso poder usar les tos propies gaites a diario n’actuaciones, conciertos o concursos.

Contador Estadistiques