'Cai', de La Nueve : "La escena folk n’Asturies nun pasa per bonos momentos pola falta de promoción"

• El sábadu 20 a les 20 hores na  VII Edición de los Conciertos de la Panadería, en Cenera (Mieres), va tener llugar el conciertu presentación del grupu folk La Nueve. David Suárez Rodríguez "Cai", un de los sos miembros, fálanos d'esti nuevu proyectu.

-¿Con ganes del debú en Cenera?

Si préstanos muncho debutar nos conciertos de la Panadería de Cenera qu’añu tres añu entama l’Asociación Cultural Serondaya. Ye un sitiu especial pa nosotros porque foi’l llugar que nos vio nacer como banda de folk, onde dimos los primeros pasos pa ser güei lo que nomamos La Nueve. Apeteznos y tenemos munches ganes del directu.

-¿Cómo naz La Nueve? (cuenta equí tola historia)?

La Nueve naz acullá pol branu del 2015, onde nos axuntamos pa tocar espontáneamente y col envís de pásalo bien. Práctiamente decidimos comprometenos cola idea de poder siguir afondando nel repertoriu tradicional del nuestru conceyu, d’Asturies y de lo que viniere y asina entamamos, comprometíos cola revalorización y reivindicación de la cultura popular asturiana. Porque a nuestru xuiciu la escena folk n’Asturies nun pasa por bonos momentos pola falta de  promoción principalmente. Sicasí, hai perbonos músicos y bandes, pero dende hai unos años, paeznos que van menguando los sitios y llugares que programen folk. Va cauntayá, yeren bayuroses les nueches celtes y agora queden bien poques.

-¿Ye necesario revalorizar y reivindicar la cultura popular asturiana como prediquen?

Ye mui necesario pa que pueda sobrevivir a la cultura de mases y a los intentos de aquellos y aquelles que nos quieren frañir como pueblu. Por desgracia, siempre hai qu’andar revalorizando la nuestra cultura y gracies a tola xente que, día tres día trabaya por ella, seguimos esistiendo con entidá propia a pesar de toles torgues que dende munchos ámbitos nos ponen. Puede resumise con esta frase L’asturianu vive, la llucha sigue, que dio títulu a discu doble qu’espulbizare la Xunta pola Defensa de la Llingua va 14 o 15 años. Nun nos queda otra.

-¿Trabayen con composiciones propies?

Trabayamos con composiciones propies, con recopilaciones recoyíes n’estudios del folklor l.lenizu, asturianu, y d’otros llugares. Por exemplu, agora mesmo tamos preparando una pieza zamorana, qu’atopamos nun repertoriu tradicional d’eses tierres. Sabemos y tenemos claro’l nuestru orixe, pero eso nun quita que podamos facer o reintepretar pieces y cantares d’ptres partes del planeta.

-¿Apuesten por temes instrumentales o tamién cuente con pieces cantaes?

A priori, tenemos un repertorio con mayor presencia instrumental, pero siempre nos presta echar unos cantares poniendo especial procuru na nuestra variante l.lingüística, el l.lenizu y reinterpretar a la nuestra manera otres pieces de la cultura popular asturiana o d’otros llugares. La presencia vocal ye una bona manera d’esparder y la nuestra llingua.

-Son toos músicos con esperiencia n'otres bandes con estilos diferentes. 

La Nueve ta formada por: David Suárez “Cai” toca les flautes treveseres y coros, Lluis Moro, les curdiones diatóniques y coros, Abel García la guitarra acústica y la voz, Adrian Glez “Lobo”, el bodrhan y les voces y David Tuñón el baxu elléctirucu y coros. Toos provenimos de bandes como Tela, La Col.lá Propinde, Fala non Caduca y Mokomitas. Toes formaes en La Pola, L.lena nos últimos años.

-L.lena ye una plaza con una gran cantidá de músicos y bandes. ¿A qué se debe?

L.lena ye un conciyu con xente con munches inquietudes. Hai una riestra de bandes y de músicos l.lenizos perhí espardíos faciendo coses lo que nos presta enforma poder volver a compartir escena con ellos y al empar col restu de músicos del país.

Otra cosa que a lo meyor tien que ver, ye que dende siempre hubo movimientu musical. Toi alcordándome del Tallerín, una asociación onde podíes aprender a tocar dellos instrumentos y ensayar aprovechando los recursos que teníen: local, equipu,...  

Angüaño’l también tien que ver el tener un sitiu afayadizu pa poder ensayar y pa ello l’ayuntamientu ufiértanos unos locales d’ensayu que nos facilita muncho esa llabor: poder ensayar nun sitiu en bones condiciones con horarios axustaos a los músicos, dexar instrumentos ensin preocupaciones, etc….

-¿Pa cuándo'l primer discu de La Nueve? (y más conciertos)

Más que falar de grabar un discu agora tamos nun momento creativu onde la prioridá ye siguir faciendo repertoriu y espardelu perhí nos conciertinos que vayan surdiendo. El discu pa más llueu, si ye que La Nueve tien que grabar un discu.