Burilo: “L’ente públicu fai más de lo que se piensa pola música del país, anque sigue siendo insuficiente”

El grupu Skama la Rede proclamóse vencedor del ‘Premiu al Meyor Cantar’ col tema ‘Condenáu’ y va representar a Asturies nel Liet International. Miguel Fernandi ‘Burilo’ (Lluanco, 1979) ye’l cantante d’esta banda asturiana.
 

¿Qué supón pa Skama la Rede algamar el Premiu al Meyor Cantar?
Ye una satisfaición enorme. Nun pensábemos que diba tener la repercusión mediática que xeneró nin tampoco la influyencia positiva hacia'l grupu en forma de propuestes de contratación de conciertos.
 
El cantar vencedor, ‘Condenáu’, ye un tema d’amor que se sal un poco de la temática de les canciones del grupu.
La verdá ye que la temática de la lletra xeneró dalgunos debates nel local d'ensayu. El facer una cantar d'amor nun entraba dientro de los nuestros planes, anque yá nesti últimu discu fiximos canciones que nun son de temática reinvidicativa. Al final, paezme que tomemos la decisión correcta y ‘Condenáu’ empieza a danos dalgunes alegríes
 
David Artime, autor de la lletra de ‘Condenáu’, tamién lo ye d’otros munchos cantares del grupu. ¿Cómo entamó esta relación y cuála ye la manera de trabayar que tienen?
David ye prácticamente miembru fundador de Skama La Rede. Dende'l primer día escribió lletres pa nós y, incluso, tuvo a puntu de ser guitarrista del grupu, pero nunca acabó de deprender a tocar la guitarra al ritmu qu'esperábemos (rises). Él siempre m'apurre diferentes lletres y lluego trabayamos sobre elles nel local.
 
¿Hubo más nervios na actuación de la gala que nun conciertu normal?
Más que nervios, tábemos tensos. Nun tamos avezaos a tocar en teatros, un solu cantar, participar nun concursu, que sía televisáu y que'l premiu sía representar al nuestru país nel Liet. La tensión quitóse col fallu del xuráu y, cuando volvimos a intepretar el cantar, notóse que yéremos la Skama la Rede de siempre.
 
Ésta foi televisada en direutu pola TPA. ¿L’ente públicu ayuda lo suficiente a la música del país?
Faise mas de lo que la xente piensa, anque siga siendo insuficiente.
 
¿Qué vos paeció’l nivel de los otros grupos nominaos?
Acordies cola escena musical del país. Mui altu.
 
El trunfu va permitivos tocar nel Liet International, qu’esti añu va celebrase n’Udine.
Ye una gran responsabilidá. Nun vamos representar a Skama la Rede, sinón a Asturies. La ilusión ye másima y la única pena ye qu'haiga qu'esperar hasta'l mes de payares.
 
Asturies lleva dos segundos puestos en tres participaciones. ¿Yá toca ganar esti festival?
Oxalá. Anque sía un tópicu, tar ehí yá ye un premiu pa la nuestra llingua; tar a la vera d'otres que nun tar maltrataes pola alministración.
 
Skama la Rede tuvo hai bien poco una renovación importante cola incorporación d’otra guitarra y la supresión de los teclaos. ¿Tán contentos col soníu nuevu del grupu?
Abúltame que tamos nel meyor momentu, yá non de soníu, sinón de trabayu internu del grupu. Les trés persones qu'entraron nueves na banda diéronnos un plus que nos vino más que bien a los que llevamos dende l'empiezu.
 
Cada vez ye más normal ver a Skama la Rede n’escenarios d’otros países del Estáu. ¿Ye difícil llegar a esti públicu?
Internet ye una ferramienta fundamental pa los grupos que nun tenemos accesu a les radiofórmules. Notámoslo cada vez que salimos d'Asturies; la xente sabe les nuestres canciones. Ye mui guapo dir a Galiza o Euskal Herria y ver al públicu cantando n'asturianu.
 
¿L’asturianu supón una torga pa salir fuera?
Nenguna.
 
L’añu pasáu asoleyaron el vuesu tercer discu. ¿Tán trabayando yá nel cuartu?
Podrémonos a ello depués del veranu. Nun tenemos prisa. De momentu vamos ocupanos de la xira d'esti añu, na que vamos presentar un set-list nuevu.
 
¿Ónde vamos poder ver a Skama la Rede nos meses próximos?
Tamos precisamente agora zarrando toles feches. Esperamos dar un avance d'elles nos prósimos díes.