Areñes: “En ‘Desmitoloxía’ vamos sentir atmósferes progresives; un amiestu de folk y rock sinfónicu”

Tante Blanco (Tolivia, 1956) y Maxi Areñes (Xixón, 1972) van ufrir en primavera’l so primer trabayu conxuntu, ‘Desmitoloxía’, del que yá conocemos el so primer cenciellu, ‘¿Quién yes tu?’. N’Asturies.com falamos con Areñes d’esti proyeutu y del otru nel que ta embarcáu, Fontoria, con álbum yá na cai y col segundu en marcha.

¿Cómo surde la posibilidá de trabayar xuntos?

Tres delles presentaciones del llibru últimu de Tante nes que tuve’l privilexu de tar acompangándolu como presentador, surdió la posibilidá de echa-y un gabitu na producción d'unos temes que Tante tenía y a los que quería dar un toque más ‘folki’, allongándose de la formula más ‘rocker’ a la que taba avezáu. Ensiguida punximosmos a trabayar, yo dende'l mio estudiu y él dende'l suyu, quedando delles vegaes na mio casa pa dir viendo los resultaos.

El primer tema que dan a conocer tien una simboloxía especial, basáu nel popular ‘Nun yes tu’ de Los Berrones.

Escribí el tema ensín pensar nuna versión del míticu canciu de Tante Blanco na so época de Los Berrones. Nun me presten les versiones, la verdá, aunque dau que se cumplen los 30 años del tema, si quixi rendir un pequeñu homenax.

La lletra escribila nun cuartu d'hora, porque teníala dientro dende va tiempu. Foi fácil espresar les vivencies que yo viví cola enfermedá de los mios padres, anque foron unos tiempos terribles. La enfermedá llevóse al mio pá primeru y seis meses dempués a mio ma…

Intenté facer un tema ‘nuevu’. Hai que tener en cuenta que ‘¿Quién yes tú...?’ tien una duración de 6 minutos. Baxé’l tempo, el tonu y dímonos cuenta de qu’en realidá llográramos crear un tema completamente nuevu que diba creciendo progresivamente; un tema de tintes progresivos, un amiestu de folk y rock sinfónicu de la que mos sentimos arguyosos.

Ye un cantar visceral. Tenga en cuenta que narra’l pasu d'esta terrible enfermedá al traviés d'un enfermu. Tenía mui presente los momentos de llucidez de los mios padres, sobre manera los de mio madre, y d'esta forma construyí’l canciu, colos recuerdos que tenía...

¿Qué más nos va trayer ‘Desmitoloxía’?

‘Desmitoloxía’ ye un conxuntu de cancios nos que se falen de personaxes de la nuesa mitoloxía, pero intentando arrodialos d'una cotidianidá, d'ehí lo de ‘desmitificar’ los personaxes. Hai cantares pa la xana, pal sumiciu, pal diañu burllón… Hai cancios pa figures como les criaes de los cures nel ámbitu rural, que siempre paez que yeren sobrines o allegaes, describiendo’l tema d'una forma socarrona.

El soníu va tar alloñáu de los tintes rock y pop a los que Tante Blanco mos tien acostumbraos, y vamos poder sentir atmósferes más progresives; un amiestu de folk y rock sinfónicu a lo llargu de tou'l trabayu.

¿Cuándo va ser una realidá’l discu?

Creemos que la primavera ye un bon momentu pa sacalu. Tenemos dellos proyeutos paralelos, compromisos varios, pero tenémoslo too encauzáu. Hai munches ganes de ver el resultau d'esti proyeutu.

¿Van llevalu al direuto?

¡Sí, por supuesto! Ye un trabayu que se presta a movelu per tolos llaos que se pueda. Va ser un discu que, al mio parecer, defiéndese mui bien nun escenariu, yá seya con una formación acústica o arrodiaos d'una banda munchu más ecléctica.

Al empar que con Tante Blaco & Maxi Areñes vusté tamién ta nel proyeutu del grupu folk Fontoria. ¿En qué tán trabayando anguaño?

Con Fontoria yá toi trabayando nel nuesu segundu discu. Sacamos el primeru, ‘Nordés’, el pasáu 20 d'abril. Lo cierto ye que nun paramos de trabayar esti añu cola presentación del mesmu.

Les maquetes del nuevu yá tan grabaes. La xente va sorprendese porque nesti trabayu vamos allexamos de les fórmules usaes nel primeru. Creo que va ser un discu más ‘comercial’, pero ensin perder la esencia de la banda. Tenemos un soníu carauterísticu y eso ayuda en munches ocasiones, pero tamién ye verdá que pue convertise nun ‘handicap’ a la hora d'intentar facer daqué nuevo. Vamos sacar un tema d'avance enantes de finar 2019, y el discu lu esperamos pa primavera.

¿D’ónde bebe Fontoria?

El proyeutu Fontoria ñaz na primavera del 2017 nel conceyu Piloña, pero nun ye hasta la seronda d'esi mesmu añu cuando llogra consolidase en forma cuartetu. El grupu adquier tintes progresivos ensin escaezer los sones más tradicionales, entamando a facer un amestáu coles músiques d'otros llugares como Breizh, el Piamonte italianu o la música tradicional d'Europa central, somorgiándose n'ocasiones nel neoclasicismu, el folk barrocu de los 60 y 70 del sieglu XX, asina como dalgún esperimentu cola música de vanguardia.

¿Quién compón la banda?

Fontoria ta compuestu por Rita María Álvarez (vigulín y coros), Xosé Ánxel ‘Allende’ (gaites y percusión), Pablo Pumarada (dodhran y percusión) y por min, cola voz, la guitarra y dellos instrumentos más.

¿Qué tal recibimientu tán teniendo ente’l públicu nestos 2 años de trayeutoria?

Lo cierto ye que dende vá dos años, na seronda del 2017, la banda nun dexa de trabayar, al principiu pasín a pasu. Sí ye ciertu que lo de esti añu foi brutal. El trabayu viose recompensáu con una xira repleta de feches, y agora mesmu yá tengo zarraes unes cuantes pal 2020. Creo que ye bona señal.

¿Cómo ve la situación de la música asturiana en xeneral y del folk, en particular?

La cultura en xeneral n'Asturies nun vive la so meyor dómina; eso creo que tenémoslo claro toos. Tamién ye verdá que hai munchu ‘cortijo’ montáu al rodiu d’esto. Unos pocos muévenlo tou y nun-yos presta que los sos dominios seyan invadíos… Pasa col mundu les lletres, la música y les artes en xeneral. Creo que nel momentu nel que el neo-caciquismu entra nel mundiu la cultura, ye la hora de dar un puñetazu na mesa. Nun me paez normal alcontrate a los cuatro de siempre (en toles rames culturales) en tolos ‘saraos’ y agora nun val la escusa de que ‘nun hai xente’. Cuando intentes sofitar daqué, cáente palos de tolos llaos; si vas pela to cuenta, tamién. A vegaes ye casi meyor dir pela to cuenta; alcuentres les mesmes torgues, pero al menos nun aguantes babayos.

¿Echa en falta más sofitu de los medios públicos de comunicación?

Siendo sinceru, y falando dende la mio esperiencia personal, nel mio casu con tolos proyeutos nos que ando metíu, namás que puedo dar gracies a los medios de comunicación. Tantu la prensa (dixital o en papel), les emisores de radio y les televisiones siempre tuvieron ehí pa prestame sofitu. Vivilo (y sigo viviéndolo) con Fontoria y Nenyuri, y agora tamién col proyeutu Tante Blanco & Maxi Areñes. Considérome un afortunau nel apartau promoción.

Na semeya, Areñes y Blanco.