Antuña: “Nel procesu de fusión de les caxes hai munchos intereses económicos y desinformación”

Les caxes d’aforros tán agora nun procesu de privatización pa beneficiu de los bancos. Marco Antuña Camporro (Venta de Soto, 1961) ye secretariu de la seición sindical de la CSI en Caxastur y miembru del Comité d’Empresa.

Caxastur, nel momentu últimu, echóse atrás nel procesu de fusión y nun autorizó’l pase del so serviciu financieru a favor del Bancu Base. ¿Qué va pasar agora?
 
Lo que va pasar nun lo sabe naide, nin siquiera los direutivos de Caxastur nin el Banco de España. En tol procesu de fusiones de caxes hai munchos y mui importantes intereses económicos y muncha desinformación interesada. La intención última de los direutivos de les caxes y del Gobiernu ye privatizales, una vez reconvertíes y saneaes con dineru  públicu, para vendeles s a los bancos privaos, fondos d’inversión estranxeros y dellos especuladores. En función d’esti propósitu, van facese les fusiones que-yos permiten facelo meyor.
 
¿Cómo se llegó a esta situación depués del bombu que se-y dio a esta fusión que diba camín de convertise na tercer caxa del Estáu?
 
Los direutivos de les caxes implicaes suañaron ser los Mario Conde del momentu coles perres de los demás y embarcáronse nun proyeutu que-yos garantizaba blindaxes, sueldos multimillonarios y una proyeición social y económica a la midida de les sos ambiciones. Pela so parte, el Banco de España dexó-yos facer, al igual que lleva dexándo-yos facer dende hai años col resultado actual. Al final, la soberbia y la incapacidá d’unos y otros desfixo esti proyeuto megalómanu.
 
 
¿La decisión de l’Asamblea xeneral de Caxastur foi la correuta vistes les condiciones de la fusión?
 
L’Asamblea xeneral de Caxasur fai lo que Menéndez manda. Votaron agora xusto lo contrario qu’aprobaron hai pocos meses y, si les órdenes foran otres, votaríen cola mesma facilidá nel sentíu contrariu.
 
La situación de CAM agora ye complicada.
 
Toles caxes alcuéntrense nuna situación complicada pol españíu de la burbuya inmobiliaria y financiera y, per enriba de too, polos errores de xestión de los sos direutivos y a la falta de rigor del Banco de España. Per parte de la CSI nun entramos  nesa batalla patética de patriotismu financieru supuestu en que dalgunos nos quieren embarcar a los asturianos contra los llevantinos. Tenemos más cosas en común colos trabayadores de la CAM, y de Caja Cantabria, Caja Extremadura o CCM, que colos direutivos de nenguna de las caxes, incluyida Caxastur.
 
¿Qué foi lo que fixo entamar estos proyeutos de privatización de les caxes d’aforros?
 
Cola escusa de la crisis económica y la so repercusión nel sistema financieru español, se pretende cumplir el vieyu suañu de los banqueros de la Gran Banca d’acabar coles caxes d’aforros, que suponen más de la metá del sistema. Tán intentándolo cola collaboración entusiasta de quienes dirixen les caxas, verdaderos caballos de Troya de la privatización nel sen d’estes y d’un Gobiernu que defende los intereses de la gran patronal y la banca.
            
Esti Gobierno ta cumpliendo al pie de la lletra los deberes que-y punxo esi conglomeráu d’intereses económicu que dalgunos llamen mercaos, pero que deberíen llamase xenocíes económicos. La receta ye la clásica del neolliberalismu: despíu llibre, retrasu y recorte de les xubilaciones y privatización de los bienes y servicios públicos. Nun ye namái’l seutor de les caxes el que va camín de la privatización; quieren privatizar la sanidá, la enseñanza y les pensiones.
 
¿Cómo inflúi na ciudadanía que la so caxa d’aforros de tola vida pase a funcionar como un bancu?
 
Perderíase’l beneficiu social que supón una entidá financiera próxima a la xente, qu’en munchos pueblos ye la referencia financiera única –porque a los bancos nun-yos interesa tener oficines en munchos d’estos sitios–; que, en concreto, n’Asturies xeneró per décades miles de puestos de trabayu direutos e indireutos; qu’apoyó iniciatives en materia d’ayuda a coleutivos como los pensionistes; que financia iniciatives sociales y culturales de too tipu, con beneficios que revierten na sociedá asturiana y non nos bolsos d’accionistes privaos; que ta con Asturies a les dures y a les madures. Too esto a pesar d’una xestión meyorable, por decirlo de dalguna manera, por parte de los sos direutivos actuales.
 
¿Y nos trabayadores?
 
Como en cualquier privatización: despíos, precariedá y condiciones llaborales y salariales peores.
 
¿Cómo ye la situación llaboral dientro de Caxastur?
 
La direición actual fai una política llaboral basada nel ‘garrotazu y tentetiesu’ y acumula ente los méritos que la prensa nun publica’l mayor conflictu llaboral de la historia reciente de les caxes, con delles xornadas de fuelga, manifestaciones multitudinaries y movilizaciones masives que foron una lleición de llucha pola dignidá coleutiva de los trabayadores de la caxa.
 
Hasta agora, xunto col resto de caxes del Bancu Base estintu, tábemos incursos nun ERE que supondría’l recorte de más de 2000 puestos de trabayu en total mediante prexubilaciones, baxes incentivaes y dispíos. La CSI, xunto con otros sindicatos del SIP, presentó un recursu llegal contra esi ERE, al igual que llevamos a los tribunales tol procesiu del SIP por considerar que yera illegal. Agora, tamos a la espera de que se defina la nueva situación creada pol fracasu del proyeutu de Bancu Base.
 
 
¿Ye posible una marcha atrás nesti procesu de privatizaciones de les caxes?
 
Non solo ye posible, sinón que ye mui necesariu. Nin como trabayadores nin como ciudadanos podemos consentir que se repartan ente unos pocos les caxes d’aforros depués de sieglu y mediu de ser el referente del aforru popular y el motor de les economíes rexonales. De la pelea de toos depende.
 
¿Qué polítiques debería tomar un Gobiernu que mire pa los sos ciudadanos no que respeuta a la banca?
 
Nacionalizar –pero non como quieren facer agora pa depués privatizar– toda aquella entidá financiera na que l’Estáu ponga dineru públicu, xenerando una banca pública fuerte que trabaye de manera eficiente en beneficiu de la sociedá y non de los especuladores. Tamién, esixir responsabilidaes penales a quienes nos llevaron a esta situación pola so política de financiar la especulación urbanística ligada de manera direuta a la corrupción política.
 
Al mesmu tiempu, esixir responsabilidaes a quienes dirixeron el Banco de España na época en que s’engordó la burbuya que nos estalló agora na cara a toos ensin que punxeren nel so sitiu a quienes nos llevaron al precipiciu. Y modificar les lleis pa que nun sigan afogando a quienes tienen una hipoteca y non la pueden pagar, de forma que, como recursu últimu, la entrega de la vivienda al bancu cancele la deuda na so totalidá.
 
¿Foi bona pa Caxastur l’absorción de Caja Castilla-La Mancha?
 
Nin pa Caxastur nin, al nuese paecer, pa los trabayadores de CCM nin pa Castilla-La Mancha. Consideramos que, una vegada encarcelaos quienes llevaron a la situación actual a CCM, debería reflotase ensin dexar de ser la caxa de Castilla-La Mancha.
 
¿La obra social y cultural de Caxastur cumple coles espectatives y necesidaes de los asturianos?
 
Como tolo qu’asocede n’Asturies, hai una serie de clanes económicos y políticos que manexen al so gustu lo que debería ser patrimoniu coleutivu. La sociedá asturiana debe sacudise la mermeyera y finar con eses práutiques más propies del caciquismu que del sieglu en que vivimos.
 
Caxastur ye una entidá pública que nunca miró pa la llingua asturiana pero en Catalunya nun tien problema n’usar el catalán. ¿Por qué esta discriminación pa colo propio?
 
Considero que quienes, en representación de les instituciones, tienen puestos de responsabilidá y de mandu relativu en Caxastur tán aplicando respeuto al asturianu la mesma política de desinterés que nes sos alministraciones d’orixe. Los sos intereses son otros.