Álvarez: “Creo que la mocedá sí que quier una alternativa política”

Belarmino D. Álvarez (Madrid, 1989) lleva dende bien mozu venceyáu al asturianismu políticu. Anguaño ye voceru d’UNA-Mocedá y representante d’esta organización na executiva d’Unidá Nacionalista Asturiana.

Como voceru d’UNA-Mocedá ¿Qué-y ofrez el nacionalismu d’izquierda a la mocedá?
Voi ser claru: futuru p’Asturies, y por tanto la posibilidá de tener un futuru n’Asturies. Lo que tenemos ye de saber tresmitir esti mensaxe. Tenemos que despertar a los mozos y moces d’esti país a la hora d’ufri-yos una alternativa creíble, ser capaces de tresmitir a la xuventú asturiana la necesidá d’entamar a dar voz y fuerza a les opciones polítiques del país, faciéndo-y por comprender que son éstes, que tienen los sos centros de decisiones equí, única y esclusivamente, les úniques que con toa seguridá van lluchar polos intereses d’Asturies, por asegurar a esti país un futuru y dignu.

Debemos de llegar a la mocedá y facela valorar por qué n’Asturies pasa lo que pasa cuando n’otros llugares del Estáu –como por exemplu n’Euskadi- s’algamen inversiones multimillonaries en reconversiones, investigación y desendolcu. Eso ye asegurar un futuru a los tuyos y ye lo que tenemos que facer ver a los nuestros y, claro, a la nuesa mocedá tamién.
 
Sicasí, vivimos nunos tiempos d’abonda desmovilización y paez que la mocedá ye ún de los sectores más desmovilizaos y desinteresaos de la política ¿Qué valoración faes d’ello?
Mui negativa, pero creo que  lo que pasa tamién en parte ye qu’existe muncha resignación, y esa resignación creo que ye lo qu’hai de vencer, que vean qu’hai alternatives qu’ufren soluciones y que n’Asturies ye’l nacionalismu-asturianismu políticu esa alternativa que ta dispuesta a camudar esta situación dende una visión asturiana.
 
¿Y qué crees que se podría facer pa involucrar a la mocedá en política?
Creo que la manera de facer entrar a la mocedá en xuegu na cuestión política pasa per plantea-y el drama social, económicu y llaboral al que se va a tener d’enfrentar en mui pocu tiempu o inclusive face-y ver en qué puntos ta afectando yá de manera directa. Ye dicir, facela vese responsable de sí mesma, que s’esmoleza pol so futuru, porque ye la mocedá la que se tien qu’enfrentar sola al so futuru.

Amás pienso que la mocedá sí que quier una alternativa política n’Asturies, nun sé hasta qué puntu conscientemente, pero ye que precisamente esi distanciamientu pa cola política vien a ser una muestra d’ello, y esi espaciu ye’l que debemos d’enllenar y por eso la mocedá debe d’ocupar un espaciu cimeru nos futuros proyectos políticos que nos planteemos.
 
¿Qué te paecen les polítiques de mocedá del Principáu? ¿Cuáles son les propuestes que tenéis dende la estaya de mocedá d’UNA?
Son unes polítiques que vienen de fuera, que nun tienen en cuenta los problemes reales d’Asturies y ehí la mocedá nun se ve reflexada, porque rara vez aporten soluciones reales a los nuesos problemes, porque éstos siguen onde taben, persisten, y nos peores casos s’agraven.

Creo que les meyores polítiques que se pudieron facer -y que nun se ficieron dende los sucesivos gobiernos que tuvo Asturies- de cara a les nueves xeneraciones foi invertir les cantidaes multimillonaries percibíes - y que se siguen percibiendo- pa la reconversión industrial, en renovar esi mesmu texíu industrial y crear nueves áries de trabayu y investigación. Facer eso en cuenta de fomentar esta cultura del prexubiláu, con tolos respetos, que nun ofrez alternatives llaborales de nengún tipu a la mocedá asturiana.

Entós repito, hai que facer dase cuenta a la mocedá qu’hai que xenerar un cambiu y usar polítiques feches equí. Si se quier futuru n’Asturies, esi futuru pasa –valga la redundancia- por Asturies, polo tanto por votar opciones polítiques asturianes que vayan a lluchar pola investigación, pol desendolcu, etc. Que queremos otros proyectos más allá d’una incineradora, que los que somos capaces d’ufrir proyectos que fomenten l’empléu n’Asturies somos los asturianistes; que somos los que velamos polos intereses d’equí, nun cumpliendo órdenes de fuera que miren por intereses más xeneralistes o inclusive d’otres zones más concretes del Estáu.
 
En rellación a la situación política del asturianismu, l’ochu de setiembre declaraste a ASTURIES.COM que la mocedá ye’l sector que más nagua pola xuntanza del nacionalismu asturianu ¿Por qué?
Por una cuestión mui clara. Ye que convendría nun ver namás que como un alcuerdu electoral esti procesu de xuntanza que se ta dando. Tamos falando de muncho más; del futuru de toa una xeneración de mozos y moces comprometíes políticamente. Entós ye obligación de la mocedá pidir públicamente l’apertura de les puertes pa esa converxencia política que faiga posible una alternativa asturiana real y palpable. Cómo nun va ser la mocedá, si entendemos que’l futuru d’Asturies pasa por que se materialice una fuerza asturiana representada nel parlamentu que lluche polo nueso. Tenemos un futuru inciertu como mozos y l’asturianismu políticu ye’l que nos va ufrir esi cambiu de dirección, por tolo que te comenté enantes de facer polítiques dende Asturies.
 
Nesti sen paez que la mocedá d’anguaño tien unes vistes más abiertes que les qu’históricamente caltuvieron les xeneraciones más mayores…
Supongo que nun ye la mesma mentalidá la de los mozos qu’hai trenta años, al entamu de la democracia, participaben nel asturianismu-nacionalismu, qu’agora. Por munches razones. ¿Qué pasa? Pues que pasaos 30 años, l’asturianismu sigue ensin representación parlamentaria –sacantes l’actual del Bloque por Asturies- entós ún mira p’atrás y ve la necesidá de conseguir qu’una fuerza asturianista entre nes instituciones. Entós esti fechu fai que la mocedá se de cuenta de que ye la hora d’unir les más fuerces posibles pa conseguir una alternativa que de soluciones a los problemes del país y la mocedá.

Nesta llínia, salieron a la lluz informaciones de qu’UNA, Bloque por Asturies y dellos independientes tán construyendo un proyectu políticu nuevu. ¿Qué papel ta cumpliendo la mocedá nesti procesu?
UNA-Mocedá nun ta presente de manera directa nes negociaciones, pero ta siendo informada día a día del desendolcu d’éstes y participa nos debates y nes decisiones que se tomen nel ámbitu internu de la nuesa formación política, como organización asamblearia que ye y na que la mocedá representa una parte más. Nesi sen sí participamos nel procesu, pero nun tamos presentes directamente na comisión negociadora.

¿Y anguaño cómo s’alcuentra’l procesu? Poques coses públiques fixéronse dende aquel actu del 8 setiembre…
Si hai poques coses que salen a la lluz ye porque evidentemente en too procesu de negociación necesítase qu’haiga una cierta prudencia a la hora de dar declaraciones, pero esto nun quier dicir nin que vaya mal nin que vaya bien, simplemente que se ta siendo discretu.
 
Lo que sí que se manifiesta claramente ye que dende la mocedá o dende UNA-Mocedá en particular, hai voluntá y ganes de llegar a un alcuerdu y que se tán dexando toles enerxíes n’algamalu. Cuando haiga qu’anunciar cualesquier resolución yá se fadrá, pero too nel so momentu.
 
Sicasí, casi tolos partíos yá tienen a los sos candidatos y dalgunos entamaron la precampaña, paez que’l tiempu ta echándose enriba pa esta opción ¿Hai dalguna fecha afitada?
Lo que faigan otros partíos nun condiciona lo que faigamos nós. Cadún marca los sos plazos, y en too procesu de negociación ye evidente que se marquen unos plazos, pero cuáles seyan éstos y lo que salga d’equí nun me corresponde a mín dicilu. Lo que sí que repito ye qu’hai absoluta voluntá en llegar a alcuerdos y la mocedá tenemos tola confianza y tola fe en que se vaya algamar; nun nos queda otra que creer nello.
 
¿Y ente les organizaciones mocedá tán dándose pasos?
La mocedá lo que fai ye siguir paralelamente los pasos que les sos organizaciones polítiques referenciales vayan dando. Lóxicamente un averamientu de la UNA al Bloque significaría automáticamente un averamientu ente UNA-Mocedá y el Bloque de la Mocedá Asturianista, y lo mesmu a la inversa. Lo que nós nun podemos de manera independiente -anque nos prestaría muncho- ye crear un espaciu d’acción conxunta y entamar a trabayar dende yá xuntos. Como cualquiera ye capaz d’entender, esto supondría una falta de sentíu absolutu aparte d’un actu de falta de fidelidá y coordinación total coles organizaciones a les que pertenecemos. Pero de toles maneres lo que sí que tamos ye mui ilusionaos en qu’a poder ser llegue pronto esi alcuerdu y, dende la mocedá, podamos ponenos cuanto enantes a trabayar nún mesmu espaciu.
 
Aparte del Bloque y de la UNA ¿Tais teniendo dalguna rellación con otres organizaciones asturianes de mocedá? Fai! por exemplu partició nos actos del 8-S…
Home, con Fai! lo qu’existe pela so parte o, lo qu’a lo menos nós entendemos polos xestos públicos que vieno faciendo d’hai un tiempu a acá, ye qu’hai un acercamientu ideolóxicu y simpatía pa con esti espaciu políticu. Nós tamién lo tenemos pa con ellos. Agora, rellaciones más allá de lo normal que corresponde a dos organizaciones cercanes ideolóxicamente y que comparten en cierta manera un mesmu espaciu, pel momentu nun les tenemos. Eso sí, esperamos poder contar con ellos y de xuru con munchos más nel futuru.
 
Falando de los independientes, el nome de Valledor ta saliendo de siguíu en prensa ¿Qué papel ta xugando nesti procesu?
En primer llugar dicir que valoramos la so honradez y decisión a la hora de dar los pasos que debía de dar, decisión que por ciertu lu digna como llíder políticu que ye. Per otru llau pues mos fai garrar cada día más confianza na normalización d’esti procesu. Pero lo que sí que ta claro a día de güei tovía nun hai nada amarráu y que sería muncho adelantar acontecimientos dicir coses como que fuera lliderar nenguna coalición electoral, como yá se vieno suxiriendo dende fuera en más d’una ocasión.

Eso sí, el fechu de ser un activu políticu importante dientro del asturianismu, fai que los sos pasos xueguen una parte importantísima porque nos da más confianza a la hora de creer que va haber una materialización definitiva del procesu.

P’acabar vamos coles crítiques que suelen nacer cada vez que se mueve daqué políticamente n’Asturies, hai xente crítico con esti procesu y hai persones que lu tachen posibilismu ¿Qué opines d’ello?
Ye que ¿Qué entienden ellos por posibilismu? Hai que saber diferenciar ente lo que ye construir un proyectu políticu seriu con posibilidaes d’entrar nes instituciones y ser posibilista. Yo nun se quién fai eses declaraciones, pero nun representen n’absolutu el sentir xeneral de la xente y menos dende la mocedá, nun ye lo que mayoritariamente se nos ta tresmitiendo en diferentes foros d’opinión o na mesma cai.

Lo que s’intenta agora ye crear un proyectu con posibilidaes d’entrar n’instituciones y tomar decisiones polítiques. Ye dicir, falamos de facer política ¿Ye ser posibilista facer política? En fin… ye buscar el decidir na toma de decisión de les coses qu’asoceden nel nuestru país. Amás ye ser responsables cola xente que nos ta pidiendo día sí y día tamién un alcuerdu del que naza un referente políticu cola mayor relevancia posible y que puea llegar a ser capaz de camudar les coses nesti país, y pueo asegurar que nello tamos y siguiremos.