El Mavi La Calzada y l'Oviedo Femenino muerren na oriella

El balonmanu foi'l sábadu cruel col Mavi Nuevas Tecnologías La Calzada. Tres una temporada impecable, na que sumaba tolos sos alcuentros por victories, perdió'l partíu defenitivu pol ascensu contra'l Granollers por un contundente 18-29 y quedó a les puertes de la División d'Honor. Tampoco pudo dar el saltu de categoría l'Oviedo Balonmano Femenino que, pese al apoyu de la so afición, nun pudo superar al Asisa Málaga Costa del Sol (29-30). D'esta forma, catalanes y andaluces algamen plaza pa la temporada próxima na categoría máxima del balonmanu estatal.

 

Nel partíu pola tercer y cuarta plaza xugáu ayeri en Pumarín, el trunfu foi llocal por un axustáu 31-30.

Mentes, el títulu de campeón de División d'Honor Plata viaxó a Catalunya (26-24).

 

La bona noticia de la xornada pal balonmanu asturianu foi'l trunfu del Juanfersa Fegar Jovellanos n'Aranda de Duero por 22-30, dos puntos que dan a los xixoneses la permanencia matemática na Lliga Asobal.