Presentación de los Premios Lliterarios 2009

El vienres día 5 de payares (20.00 hores; Centru de Referencia de la Cultura y la Llingua Asturiana “Casa de los Alberti”, Ciañu, Llangréu) van presentase les obres ganadores de los premios lliterarios n'asturianu que convoca añalmente la Conseyería de Cultura y Turismu.

Nel actu van presentase los llibros Mientres cai la nueche, de Pablo Antón Marín Estrada, Premiu “Xosefa Xovellanos” de novela; Pastoral en sol mayor, de Miguel Allende, Premiu “Xuan María Acebal” de poesía; El destín treshumanu, de Xulio Arbesú, Premiu “Máximo Fuertes Acevedo” d'ensayu; y Les puertes del paraísu, de Ismael González Arias, Premiu “María Josefa Canellada” de lliteratura infantil y xuvenil.

L'escritor José Antonio García Fernández, Chechu García, va facer una presentación conxunta de les cuatro publicaciones, a la que va siguir una mesa reonda y coloquiu colos premiaos.

La presentación entámenla la Conseyería de Cultura y Turismu, l'Ayuntamientu de Llangréu, l'Asociación Cauce del Nalón y Ediciones Trabe.