II Aniversariu Tertulia Pachín de Melás: Mesa Redonda “IKE Solución”

El próximu xueves 16 d'avientu cumplese'l II Aniversariu de la Tertulia Pachín de Melás, que lo celebrará realizando una Mesa redonda sobre otru aniversariu, los 20 años de la ocupación de la fábrica de camises IKE de Xixón, sol títulu de “IKE Solución” nel Hotel Alcomar de Xixón a les 20:30 hores, con entrada gratuita.

Pa falar d'ún de los conflictos llaborales más importante de la ciudá de la nuestra hestoria recién, cola peculiaridá de ser un conflictu protagonizáu por muyeres, vamos cuntar cola presencia de Rubén Vega, historiador y especialista nos procesos de reconversión en Xixón y Asturies; Guillermo Rendueles, psiquiatra y coautor del llibru “IKE, retales de la reconversión” y Ana Carpinteru que foi trabayadora d'IKE.

Queremos convidar a toles y tolos xixoneses a compartir con nós esti II Aniversariu, participando nesta Mesa Redonda con una tema como'l de la ocupación de IKE, del que consideramos podemos sacar munches esperiencies y conocencies, que llueñe de pertenecer al pasáu, pueden ayudar a entender cómo tenemos de planteganos un futuru llenu d'amenaces y retayos de derechos sobre les persones que viven del so trabayu.