Espectáculu de solombres “El turnebís del tribilín”

A les 18 hores, nel Centru Municipal de L’Arena, en Xixón.

Col nome de El Turnebís del Tribilín, ñaz en Xixón, en 1985, un grupu de teatru de solombres de les manes de Manuel Santiago López, componente d’aquella, y durante 8 años, del colletivu d’animación Quiquilimón.

El Turnebís del Tribilín, ye ún de los poquísimos grupos de teatru solombres de tola Península Ibérica, a pesar de ser ésti un arte milenariu y de muncha tradición n’otros países como China, Turquía, Grecia, Exiptu, etc.

El nome del grupu surde d’una anécdota familiar y d’un tracamundiu de palabres ensin un significáu concretu.

Nestos años, el grupu fizo dellos trabayos de solombres chinesques que representó por centros municipales, cases de cultura, circuitos teatrales, etc…, y tamién trabaya per centros escolares dando sofitu a los estudios billingües n’Inglés cola representación de cuentos nesti idioma.

Los sos espectáculos, que s’acompañen xeneralmente con música en direutu, básense nos argumentos d’estremaos cuentos y romances recoyíos de la tradición oral, como Toma castaña, El molinillu máxicu, El mozo arriero, El enamorado y la muerte, La esposa infiel, etc.

Ello ye, que pal llunes día 15 de payares, a les 18 hores, nel Centru Municipal de L’Arena, en Xixón, tendremos la oportunidá d’echar un güeyu al so trabayu y aprovechar pa que les nueves xeneraciones conozan esti tipu de teatru y les hestories que se cuenten con el, ya que van dedicaes a un públicu familiar. Gustará-yos a los neños y neñes, pero a los mayores gustará-yos tamién, y valdrá de filu trasmisor ente xeneraciones.

Nesti espectáculu, d’al rodiu de sesenta minutos, representaránse dellos romances y otres hestories. Apaecerán d’ente la escuridá y la lluz personaxes como’l mozu arrieru, antiguu trasportista, que defenderá la so vida de los peligros del camín, la mesma muerte dará un paseín per ente los vivos, habrá escenes d’amor codificaes, y hasta ye probable que dalgún asistente salga al escenariu a collaborar na representación d’hestories. Nun dexar pasar la ocasión.