Charra de Beatriz R. Viado sobre'l tratu a la muyer nos medios de comunicación

El miércoles 20 d’ochobre a les 18:30 h. la Casona del Bravial de Blimea va cuntar cola presencia de la periodista Beatriz R. Viado, qu’ufiertará una charla que lleva por titulu “¿Ú tán les muyeres? Ausencies y presencies femenines nos medios de comunicación”. Nella, pente medies del análisis de la prensa diaria,  va falase sobre’l tratu que se-yos da a les muyeres nos diferentes medios de comunicación. L’actu va tar presentáu pola conceyala de cultura del Ayuntamientu de Samartín del Rei Aurelio, Gema Suárez Torre.
   
Beatriz R. Viado ye llicenciada en Ciencies de la Información pola Universidá Complutense de Madrid. Foi redactora y directora del selmanariu n'asturianu Les Noticies y ye  collaboradora de la publicación feminista Muyeres A teyavana,  de la publicación Atlántica XXII y de Diagonal Asturies.

La periodista tien publicaos los llibros El país del silenciu  xunto cola escritora Ana Vanessa Gutiérrez y el llibru xuvenil  Qué ye que ye'l tercer mundu. Un viaxe del centru a les periferies. Amás, foi ganadora del I Premiu de Periodismu n'asturianu Enriqueta González Rubín col reportaxe El campu asturianu, en víes d'estinción.

La charla ta organizada pola Oficina de Normalización Llingüística de Samartín del Rei Aurelio ya  inxertada dientro del conxuntu d’actividaes que se tan celebrando nestos últimos meses na Casona del Bravial destinaes a fomentar la llingua y la cultura asturiana.