Convócase una segunda concentración n'Uviéu pola estradición de los torturadores del franquismu

Esti miércoles 9 d'abril, a les siete de la tarde, La Comuna d’Asturies, el grupu asturianu que forma parte de la Coordinadora Estatal d’Apoyu a la Querella Arxentina (CeAQUA), convoca una concentración énte’l Teatru Campoamor d’Uviéu contra la impunidá de los crímenes del franquismu y pola estradición de tolos torturadores.

Ye la segunda concentración n’Uviéu depués de la convocada la selmana pasada pola vista d’estradición na Audiencia Nacional al ex guardia civil Jesús Muñecas Aguilar, acusáu por tortures a deteníos nos años 60. Esti xueves 10 d'abril ye la vista d’estradición del policía Juan Antonio González Pacheco, Billy el Niño, tamién pol delitu de tortures. Na vista del xueves pasáu, fiscalía y defensa coincidieron na negativa a estraditar a Muñecas por considerar que los actos que se xulguen foron casos aislaos y yá tán prescritos. Nun se consideren una práctica sistemática que los convierte en delitos contra la humanidá y, polo tanto, imprescriptibles según la xusticia universal. Con esti determín, l’Estáu español vuelve a impidir l’accesu a la xusticia a miles de torturaos y familiares d’asesinaos, y da un pasu más pa convertise n’abellugu internacional de criminales franquistes. Na vista nun hubo nenguna voz que falare nel nome de les víctimes. Esto nun ye una sorpresa pa CeAQUA porque la xusticia española lleva décades archivando casos contra el franquismu.

L’equipu d’abogaos de la Querella Arxentina y los grupos qu’apoyen esti procesu en tol Estáu siguen trabayando en más denuncies. Va pidise a la xueza arxentina la imputación d’otros siete policíes qu’apaecen en delles de les denuncies presentaes. Ente ellos ta Pascual Honrado de la Fuente, denunciáu por Gerardo Iglesias na so querella por sufrir tortures en comisaría cuando lu detuvieron a los 17 años acusáu d’incitar a la fuelga na mina.

Siete ministros de gobiernos de Franco apaecen tamién na Querella Arxentina como implicaos nes execuciones firmaes nos últimos años de la dictadura, amás de dellos directores de prisiones y xueces militares que participaron en xuicios sumarísimos.

El trabayu de La Comuna d’Asturies sigue cola recopilación de delitos cometíos nos años de la Guerra Civil y la dictadura franquista. Nesti mes d'abril va dase a conocer la presentación de más denuncies de casos asturianos.