Berta Piñán

Na celebración del 25 aniversariu d’Asturies.com reúnense una serie de factores particulares qu’habría que sopesar dende una reflexón más amplia alredor de la prensa d’anguaño.

La concurrencia de medios de comunicación diversos, plurales y estremaos ye una de les ferramientes más adaptaes a la hora de calibrar la calidá democrática d’una sociedá. La configuración tan especial del panorama informativu actual, onde la que conocemos como prensa tradicional convive colos formatos dixitales nuevos y cola distribución de conteníos al traviés de les redes sociales, faen que publicaciones como Asturies.com garren una singularidá especial y lo faigan dende una mirada valiente y rigurosa.

La historia d'Asturies.com ye una historia d'apueste y esfuerzu digna de reconocimientu. Nació en 1997, cuando un mediu d'estes característiques yera dafechu escepcional, con dos retos que riquen d’esa valentía: informar dende una plataforma dixital y, fundamentalmente, facelo en llingua asturiana.

25 años depués el periódicu ye’l mediu de comunicación on-line más veteranu d’Asturies, y caltienen vixentes los sos principios fundacionales: informar n’asturianu sobre tou tipu de conteníos y temátiques y facelo con una sensibilidá especial pa colos asuntos qu’atañen a la nuestra llingua y a la nuestra cultura. Asina, amás del diariu dixital, el proyectu vieno desarrollando otres árees destinaes a la difusión del nuestru patrimoniu inmaterial, faciéndolu accesible al traviés de la rede pa cualquier persona interesada pola cultura y la historia d'Asturies.

Si los medios de comunicación son necesarios nuna sociedá democrática, periódicos como Asturies.com son indispensables, porque al so llabor informativu suma la so aportación al espardimientu y a la conocencia de la nuestra llingua, lo que lu convierte nuna ferramienta cultural singular na nuestra comunidá y fundamental pa la normalización del nuestru idioma. Un espeyu necesariu pa mostrar una imaxe precisa y completa d'Asturies. Y que rebate los discursos vacios de la intoleracia, la mentira y el prexuiciu dende l'argumentu incontestable del arguyu, l'amor y la dignidá.

La mio felicitación a les persones que faen Asturies.com y a les que collaboraron con esti proyectu nestos años. Felicitación, por supuesto, que faigo estensiva a les y los sos llectores, ente los que m'incluyo. Por un futuru de la nuestra llingua onde Asturies.com siga activamente siendo la referencia, pero non un casu escepcional.

Berta Piñán

Conseyera de Cultura, Política Llingüística y Turismu