Adrián Barbón

Adrián Barbón

Quiero treslladar la mio sincera felicitación a la xente que fai posible Asturies.com: empezando pela dirección que punxo en marcha esti proyectu va yá venticinco años y pasando per toles persones que trabayaron y collaboraron con esti mediu nesti tiempu, ensin escaecer, por supuesto, a les persones llectores y usuaries d’esta cabecera dixital emblemática n’Asturies.

Falar d’un diariu dixital que lleva dende 1997 comunicando l’actualidá asturiana na nuestra llingua materna ye reconocer, per un llau, l’apueste y l’esfuerzu qu’hai detrás d’una iniciativa pionera que se punxo en marcha nun momentu en que malapenes s’atopaben cabeceres informatives na rede. Ye falar d’un compromisu editorial pa cola información xeneral de los acontecimientos que se producen n’Asturies y pa con un idioma –nesti casu l’asturianu–, ufiertando esti diariu l’exemplu de la importancia y el valor de la normalización social de les llingües minorizaes. Y, por supuesto, ye demostrar la fidelidá de les y los llectores que lu lleven siguiendo toos estos años atopando nesti mediu de comunicación la so voz y l’enfoque de la realidá col que meyor s’identifiquen.

Asturies.com ye amás la plataforma onde se desendolcaron estayes del valir de 'A la gueta los sueños', 'Espaciu y tiempu' y el 'Proyectu Caveda y Nava' que tolos asturianos y asturianes deberíemos conocer pa tener un meyor conocimientu de la nuestra cultura, y que permite a cualquier persona interesada averase a la nuestra llingua, a les manifestaciones artístiques y la tradición d’Asturies.

Norabona por tanto a la familia d'Asturies.com por llevar venticinco años faciendo normal lo que ye normal: comunicar el mundu dende una mirada y la llingua propia.

 

Adrián Barbón

Presidente del Gobiernu del Principáu d’Asturies

Contador Estadistiques