Estructura vital

Josep Carles Laínez's picture

Atalantamos que les nueses vides son orixinales, pero ye namái una creencia, como a quien-y da en creer en xanes o n’ovnis. La única singularidá de la vida radica nes caxigalines; el restu, una cadarma que nun nos dexa mover. Sobre un esquema xeneral, asítiense les pieces concretes de caún de nós: de piel p’afuera, abultamos únicos; de piel p’adientro, más únicos aínda. Sicasí, vistos en planu cenital, o güeyando los nuesos vectores, somos seres predecibles; prefiguraos; monótonos. Cencielles formigues que nun se distinguen les unes de les otres.

Por exemplu, el mio periplu vital nun guarda rellación cola vida de Martín López-Vega: nin nacimos nel mesmu país, nin nel mesmu añu, nin tenemos les mesmes amistaes. Nun sé nada d’él, y nin siquiera remembro si dalguna vez llegamos a escribinos. Con too y con eso, lleo’l so Parte meteorolóxicu p’Arcadia y redolada, y Martín desapaeció, pos de quien ta a falar ye de min; non si entramos en detalles, pero sí na vida esperable d’un guaḥe de los setenta. Creíemos tener autonomía, inocentes nós…, porque l’acordar de cada ser humanu ta marcáu por acontecimientos qu’abulten el mesmu, que son, esencialmente, el mesmu.

Quiciabes la predestinación nun sería otro qu’esta sensación de tener los finxos amarraos a daqué desconocío. Nun ye que’l futuru tea escritu, sinón que lu ta’l presente. El futuru nun esiste, claro. Siempre ye una triba de pasáu cuando lu vemos dende’l güei. Y pa nós el futuru d’aquellos neños foi’l pasáu d’esti presente. Caxigalines, dixi. Pero qu’a vegaes cuesta estremar de la vida.

Contador Estadistiques