De madreñes (2)

Dani García de la Cuesta's picture

Comentaba na entrada 'De madreñes (1)' qu’hai dos llugares públicos n’Asturies onde ver coleiciones de madreñes: el Muséu de la Maera, en Casu, y el de Grandas de Salime, el de Pepe’l Ferreiru. Punxi, amás, una semeya d’unes madreñes a ver si sacábemos d’ónde yeren, d’Asturies, de Cantabria, de Llión o Galicia, y la cosa ta tovía ensin resolver. www.facebook.com/photo.php?fbid=411850125670692&set=pcb.411850329004005&type=3&theater

Ello ye, que les madreñes d’esa semeya tán nun muséu holandés, en Zaanse Schans, www.dezaanseschans.nl/en/, y figuren como de Spain. ¿Cómo ye ho? ¿Dende cuándo s’usen madreñes en Spain? ¡¡Home, quita p’allá""… Ser serán de dalgún llugar onde s’usen. Barrunto que son asturianes, pero fai falta confirmalo.

Nesti muséu, ente otres munches coses, pue vese l’usu industrial de molinos de vientu, queseríes, etc., y hai un cientu de tiendines pa mercar productos artesanales, y 'típicos' holandeses, como por exemplu zuecos/klompen. Llamóme l’atención un espaciu onde había una coleición de madreñes grandísima y mui prestosa; hasta había un bancu/burru pa un madreñeru que trabayaba ellí mesmu. Nes semeyes vese como ye esti sitiu.

Los klompen son un productu turísticu, yá que la xente identifícalos con Holanda, y acaba llevándolos pa casa de recuerdu o pa usar. Hai tamaños asgaya, hasta de llaveru, y pueden topase per cualaquier sitiu.

Siempre que sales d’Asturies ves como n’otros llugares venden lo de so, coses que los identifiquen, como un productu más, atractivu y con salida, siempre que lo pongas a la vista y nun llugar afayadizu.

Los museos que cité anantes nun dexen de ser una manera d’intentar proyeutar y afalagar la visita de xente a eses zones. Tamién puen ser dinamizadores d’estudios, proyeutos de conservación, espardimientu de tradiciones, y, bien llevaos, hasta pueden dar trabayu. Digo yo, ¿ye tan difícil dase cuenta de que les madreñes, amás de lo que yá son y serán por tradición y hestoria, pueden ser tamién un atractivu turísticu como beber sidre, los asturcones o’l propiu paisaxe?

¿Ye tan difícil dase cuenta de que nun hai na zona central asturiana un llugar qu’afalague esta temática, y onde podamos ver lo que sinifica l’usu tradicional d’esti calzáu? Un calzáu que mos xune culturalmente a un montón de persones, pueblos y d’alcordances.

¿Nun sería un llugar bien prestosu’l Muséu del Pueblu d’Asturies pa facer un muséu vivu tolos fines de selmana onde poder ver como trabaya un madreñeru, un goxeru, un facedor de gaites, cómo se fai quesu, pan, llana, un horru, unes pipes y otru cientu coses?, ¿Un llugar onde, amás, como asocede n’otros espacios museísticos, puedas comer y beber dalgo tradicional?, ¿Un llugar onde puedas sentir música asturiana, baillar, conocer coses sobre la vestimenta, los deportes, etc.?

Precisamente, fue con esta idega cola que ñació’l Muséu, pero dempués de tou esti tiempu desdexóse, anque tovía nun ye tarde pa retomalo y facer d’esti espaciu un llugar vivu, casi dafechu. Cuando pa la xente de fuera en Xixón, mesmamente cuando vienen los crucerones esos, que los lleven a les grandes superficies ¿Esa ye la idea cola que marchen d’Asturies? ¿Eso ye como sabemos vender lo nueso? ¿Ésta ye la manera de dar trabayu gracies a la nuestra propia identidá? Hai que dar un vueltina a tou esti asuntu, por supuestu dende’l ámbitu políticu.

¡¡¡Por un Muséu del Pueblu d’Asturies vivu!!!

De madreñes (2)
De madreñes (2)
De madreñes (2)
De madreñes (2)
De madreñes (2)
De madreñes (2)
De madreñes (2)
De madreñes (2)
De madreñes (2)
De madreñes (2)
De madreñes (2)
Contador Estadistiques