"Ye'l principiu de la normalización llingüística n'Uviéu", afirma Álvarez López

Izquierda Xunida (IX) va presentar a los sos socios de gobiernu n'Uviéu una serie de midíes pa potenciar l'usu del asturianu nel conceyu. "Ye'l principiu de la normalización llingüística n'Uviéu", afirma Iván Álvarez López, conceyal d'Interior.

El documentu, qu'IX va presentar previsiblemente na Xunta de gobiernu d'esti vienres, inclúi dellos puntos que van dende rotulación progresiva de los edificios municipales, asina como de los vehículos y les máquines municipales, l'entamu de cursos d'asturianu pa funcionarios, la renovación progresiva de los cartelos y indicaciones una vegada aprobada la toponimia tradicional, y la valoración de la llingua asturiana nes convocatorios d'emplegu cuando'l puestu lo requiera.

"Ye'l principiu de la normalización llingüística n'Uviéu", apunta Álvarez López, que señala que'l documentu compuestu por cinco puntos naz del so área, pero pretende ser "tresversal". D'igual forma, l'edil espera nun atopar torgues de los sos socios de gobiernu, PSOE y Somos Oviedo, p'aprobar estes iniciatives na Xunta de gobiernu próximu. Tamién que'l Serviciu de Normalización Llingüística d'Uviéu pueda echar andar más pronto que tarde.

L'asturianu nes oposiciones y concursos

Entrugáu sobre'l papel que xugará l'asturianu nes oposiciones entamaes pol Conceyu d'Uviéu, Álvarez López confirmó que namái se va tener en cuenta pa la plaza que va convocase pa llevar dicho SNL, ensin descartar que nun futuru pueda ampliase a otros concursos.

Otra manera, el conceyal de Cultura Roberto Sánchez Ramos 'Rivi', miembru tamién del grupu municipal d'IX, afirmó esta mañana que "la cooficialidá fadrá más ricos culturalmente a los asturianos y asturianes. Dende l'Ayuntamientu tenemos q fomentar la normalización". D'igual forma anunció'l destín de 44.000 euros pal asturianu, de los que 24.000 van dir pa l'Academia de la Llingua Asturiana.