"Ye'l momentu de que'l texíu cultural qu'hai n'Asturies se convierta nun nichu de desarrollu económicu", diz Elipe

"Esto yá lo fixeron n'otres autonomíes hai décades", recordó'l miembru del equipu de Tomé, que confirmó avances en política llingüística na negociación presupuestaria.

Xune Elipe intervieno esta mañana con motivu del final de les conversaciones sobre les cuentes del 2024 que mañana van aprobase na Xunta Xeneral xunto cola diputada eleuta por Podemos, Cova Tomé, espulsada'l sábadu de la formación al igual que so compañeru y Laura Tuero, a la espera de si s'almite o non un recursu. Ésta confirmó, en castellanu, magar "nun consiguir tolo que nos prestaba", que celebra "dalgunos ameyoramientos nes árees que son pa nós especialmente significatives, una d'elles la de la cultura y la política llingüística onde, más allá del volume d'euros dedicáu, lo que consiguimos sobre manera, y esperamos que se cumpla, ye un compromisu firme pa camudar el paradigma de la xestión cultural, pa poner en marcha l'Axencia Asturiana de les Industries Culturales y pa tomar una serie de midíes que quiciabes nun necesiten una inversión importante pero sí un cambiu de visión, de cómo se xestiona la cultura n'Asturies."

"Ye'l momentu de que'l texíu industrial, cultural y creativu qu'hai n'Asturies se convierta nun nichu de desarrollu económicu y creación de puestos de trabayu", daqué que yá "fixeron n'otres autonomíes hai décades", apuntó Elipe, que punxo l'exemplu de Galicia "con ADALIG, l'Axencia Galega das Industrias Culturais", Catalunya, València o Euskadi, "onde tienen hasta siete programes específicos dedicaos a la industria cultural". "Agora que tanto se fala del retu demográficu, de salvaguardar a les xeneraciones nueves pa que nun tengan que marchar fuera, creemos que nesti momentu ye un sector estratéxicu pal afitamientu de población moza n'Asturies", aseguró'l cantante.

L'avilesín considera qu'esa Axencia Asturiana de les Industries Culturales, un compromisu eleutoral de la FSA, "ye la que tien que desarrollar y poner en marcha esos programes que lleven a esi cambiu de modelu cultural n'Asturies. Llevamos años pidiéndolo".