El Gobiernu de Barbón aprueba los Presupuestos col apoyu de Foro y Tomé

24 votos a favor y 21 en contra. Adrián Barbón consiguió aprobar per quintu añu los sos Presupuestos, nesta ocasión col apoyu de les dos formaciones nel Gobiernu, FSA y Convocatoria por Asturies, y los dos diputaos del grupu mestu, Adrián Pumares y Cova Tomé, refugando toos ellos toles enmiendes parciales del Partido Popular (PP).

Al rodiu les 12.20 hores facíase’l sufraxu y quedaben aprobaos de manera definitiva proyeutu de llei de Presupuestos Xenerales pal 2024, el más altu de la historia al manexar 6.348 millones d'euros. La selmana pasada salvara les enmiendes de totalidá de PP y VOX, y güei valtáronse les 168 parciales presentaes polos populares –la formación d’ultraderecha nun rexistró nenguna–.

Por contra modificóse la propuesta orixinal con 38 pautaes previamente cola diputada eleuta por Podemos, Tomé, y Foro. Ente elles taba la que fina col previstu intercambiador de L’Humedal en Xixón, qu’acabó por propiciar l’apoyu de Pumares.

Enantes de la hora y venti minutos de votaciones tuvo llugar un alderique nel que’l PP, con intervenciones de Beatriz Polledo y Luis Miguel Venta, foi mui críticu coles cuentes, sobre manera’l diputáu maliayu. Emplegó términos como “socios comunistes” y “tránsfugues” pa referise al grupu mestu, y calificó’l trámite parllamentariu de “farsa política” y “engañu a los asturianos”.

El socialista Luis Ramón Fernández Huerga, pela so parte, recordó que ye’l quintu añu nel qu’un Executivu en minoría saca los Presupuestos y emponderó la “capacidá de diálogu d’esti Gobiernu y del anterior”. “Creo que tienen reflexonar, deben plantegase qu’un non al Presupuestu depués d’una espantada cola Llei d’Impulsu Demográficu amuesa que tán más cerca de VOX, más cerca del so interés partidista, qu’otra cosa”, apuntó dirixéndose al PP.

Na semeya, un momentu de les votaciones.