¿Ye una alternativa enterrar los gases contaminantes?

La selmana pasada la empresa Hunosa dio anuncia del interés de la empresa en dellos proyectos esistentes pa llevar alantre un programa de reutilización de les antigües mines de carbón abandonaes n'Asturies como sumideros de dióxidu de carbonu, gas causante d'efectu invernaderu. Ello ye posible gracies a una tecnoloxía nueva qu'inyecta a presión el CO2 a grandes fondures nes vetes de carbón quedando ellí presu'l gas. L'interés d'Hunosa vien al rau de los esperimentos que ta faciendo nesti sentíu'l Centru d'Investigaciones Enerxétiques, Mediuambientales y Tecnolóxiques (Ciemat), dependiente del Ministeriu d'Educación y Ciencia, y que tien yá instalaciones esperimentales funcionando a la otra parte de la cordal cantábrica. Empresa y sindicatos mineros mayoritarios ven nello un preséu pa torgar el cambéu climáticu y poder concuellar colos oxetivos del protocolu de Kyoto.

Contra esta posibilidá pronuncióse ayeri la organización Ecoloxistes n'Acción, que ye contraria dafechu a lo que calificó de política de "esmucir embaxo l'alfombra" la contaminación y dexá-yos otra hipoteca más a les xeneraciones futures en cuenta d'atacar el problema del escesu d'emisiones contaminantes. Pal grupu conservacionista que representa Paco Ramos, dir tres de soluciones que nun pasen pela mengua d'emisiones nun ye lo más afayadizo, pero amás d'ello los ecoloxistes afirmen qu'esta tecnoloxía, qu'amás permitiría la lliberación del gas metanu que va enxertu nes vetes de carbón abandonaes, ta namás en fase de prebes Ecoloxistes n'acción afirma nesti sentíu qu'esisten proyectos, ente los que cita l'ARC Enhanced Coal-Bed Methane Recovery Project, ente los EE.UU, Canadá y el Reinu Uníu y el del mesmu Ciemat, pero que nengún d'ellos pasó a fase comercial, y ello ye porque pa que pa poder atropar el CO2 esti ha estremase d'otros gases colos que normalmente vien mecíu como resultáu de los procesos de combustión en centrales, un procesu que resulta caru enforma, tanto como ente 100 a 300 dólares per cada tonelada d'emisión de carbonu.

Nel futuru, y cola meyora de les tecnoloxíes, estos costes podríen menguar hasta los 10 dolares la tonelada, pero ello nun finxu de tiempu que s'asitia nel añu 2015. En cualquier casu, amás del coste de dixebrar el carbonu de tolos demás gases, Ecoloxistes espliquen qu'esisten otros costes adicionales como'l del tresporte del gas dende les centrales térmiques hasta los pozos, creando too ello una serie de costes económicos y de gastu enerxéticu, lo que pue llevar a la paradoxa de que pa recuperar una tonelada de CO2 se xenere otra nel procesu d'estracción y trasiegu del gas.