Queipo diz non a la oficialidá, anque acudirá “por responsabilidá institucional” al conceyu

El PP nun camuda la so postura actual con respeuto a la oficialidá del asturianu y del gallego-asturiano. El so presidente Álvaro Queipo confirmó esti martes, después de recibir el día anterior la invitación per vía telefónica d’Adrián Barbón, que nun va votar a favor.

“Adrián Barbón utiliza les nueses llingües cuando-y convién esviar l’atención del fracasu de la so xestión, de la so falta d’idees, del so inesistente proyeutu p’Asturies y de los graves problemes que sufre la nuesa tierra”, apuntó’l dirixente popular, que diz tar a favor de la proteición de les llingües propies “respetando la voluntariedá”. Considera que la oficialidá implica una obligatoriedá que refuga magar ser el mandáu constitucional pa los territorios nos que conviven llingües propies col castellanu: “Asturianu sí, pero en llibertá”, llegó a afirmar.

“Nun vamos negociar reforma nenguna del Estatutu d’Autonomía d’Asturies qu’implique la obligatoriedá de les llingües asturianes. L’asturianu y l’eonaviego son un motivu d’arguyu p’Asturies que debemos promover y protexer, especialmente d’aquellos que traten d’usales como armes p’aventar, como un motivu de división ente asturianos y como focu artificial de crispación y d’enfrentamientu”, dixo’l de Castropol, qu'añadió que “con un Gobiernu del Partido Popular n’Asturies les llingües asturianes tarán a salvo, a salvo de los que les quieren enmudecer y a salvo de los que se quieren aprovechar d’elles con estos fines personalistes y partidistes”.

La llamada de Barbón ayeri foi la primera que recibió del socialista nesti tiempu al frente del so partíu, criticó Queipo, que confirmó la so asistencia al conceyu conxuntu convocáu pol presidente del país con tolos grupos parllamentarios, a esceición de VOX, “por responsabilidá institucional”. Al mesmu tamién va acudir Xosé Antón González Riaño, presidente de l’Academia de la Llingua Asturiana (ALLA).

Na semeya, Queipo'l vienres nel Campoamor na xunta estraordinaria de l'ALLA pol XLV Día de les Lletres Asturianes.