“Ye un tiempu nuevu nel PSOE y ye’l momentu d’enganchase a la oficialidá”, asegura Pontón

|
María Luz Pontón y Xuan García Vijande

María Luz Pontón y Xuan García Vijande encargáronse esti miércoles de presentar la plataforma ‘Socialistes pola Oficialidá’. “Ye un tiempu nuevu nel PSOE y ye’l momentu d’enganchase a la oficialidá”, apuntó Pontón, optimista sobre esta cuestión.

L’actu tuvo llugar esta mañana na Casa’l Pueblu d’Uviéu y contó cola presencia de dalgunes de les persones que sofiten esta plataforma de creación nueva a la que, según los sos voceros, ta sumándose cada vez más xente. “Tamos ablucaos de la respuesta”, afirmaron.

Diego Valiño, conceyal del PSOE nel Conceyu d’Uviéu; Silvino González Fernández, secretariu de Política Municipal n’Uviéu; y Victoria Fernández Pérez, secretaria d'Educación n’Uviéu yeren dalgunes de les persones qu’acudieron a la presentación. Otros munchos socialistes, como l’Eurodiputáu Jonás Fernández o’l secretariu xeneral del PSOE en Samartín del Rei Aurelio, Xosé Ramón Ardines, tamién sofiten la iniciativa de Socialistes pola Oficialidá.

Los dos voceros presentaron el manifiestu de la plataforma asina como la enmienda al artículo 367 de la ponencia marcu del congresu de la Federación Socialista Asturiana (FSA) cola intención d’animar “a los militantes de les distintes agrupaciones a llevalo a los órganos de les sos agrupaciones y aprobala pa que llegue al Congresu col máximu consensu y pueda sometes a votación de la militancia del mesmu”. Dambos destacaron la tresversalidá de la so propuesta, como amuesa que Pontón sía partidaria d’Adrián Barbón y García Vijande de José María Pérez López, y la so intención de “nun interferir nes primaries”.

Sobre la predisposición de dambos candidatos a llevar alantre esta cuestión, el conceyal en Morcín apuntó “qu’hebo contautos non oficiales, pero al haber miembros de los dos candidatures nel grupu sí se faló con ellos. Dende equí damos-yos la posibilidá de que se posicionen públicamente y qu’apoyen o non esta enmienda”. “Nós pensamos que sí, qu’esto va salir p’alantre col apoyu d’ellos”, añadió Pontón, que se siente “mui optimista”.

"Tán otros candidatos y nengún ta a la escontra. Ye un tiempu nuevu onde se cambien les persones y hai otros proyeutos, y ye’l momentu d’enganchase a la oficialidá”, siguió la militante de l’agrupación socialista d’Uviéu.

Defensa de los derechos llingüísticos

Enantes, García Vijande destacó que “la defensa de los derechos sociales tien que ser una seña d’identidá del PSOE, como se fixo col matrimoniu igualitariu o la Llei de Dependencia”, pa depués recordar que’l partíu ye un garante de los derechos llinguísticos n’otros territorios con idioma propiu y que tamién debería selo n’Asturies. Pela so parte, Pontón emponderó’l consensu esistente na sociedá asturiana pa col asturianu y afirmó que “nun hai normalización ensin oficialidá”.

Na semeya, Pontón y García Vijande.

Contador Estadistiques