Xuristes van aldericar sobre la Llei d’Usu cuando se cumplen venti años de la so aprobación

|
Cartelu 20 años Llei d'Usu

En marzu del 1998 aprobábase na Xunta Xeneral y espublizábase nel BOPA la Llei d’Usu y Promoción del Bable/Asturianu. Pa conmemorar esta fecha, la Conseyería d’Educación y Cultura entama un alderique con xuristes sobre’l desarrollu d’esta norma.

En concreto, baxo’l títulu de ’20 años de la Llei d’Usu y Promoción del Asturianu’, van ponese sobre la mesa dellos temes, como’l valir d’esta norma como ferramienta de normalización, el marcu llegal asturianu en comparanza con otres lligües minorizaes, el nivel de desenvolvimientu de la llei y les espeutatives de futuru. Los ponentes que van intervenir son José Manuel Pérez Fernández, lletráu del Tribunal Constitucional y profesor de Derechu Alministrativu de la Universidá d’Uviéu; Leopoldo Tolivar, caderalgu de Derechu Alministrativu de la Universidá d’Uviéu; y l’abogáu Nicolás Bartolomé.

L’actu va tener llugar el llunes, a les 19 hores, nel Salón de Té del uvieín Teatru Campoamor, y va tar moderáu por Vicente Hoyos, secretariu xeneral téunicu de la conseyería. La Llei d’Usu y Promoción del Bable/Asturianu, del 23 de marzu del 1998, foi un testu presentáu pol Partíu Asturianista (PAS), apoyáu pol Gobiernu del popular Sergio Marqués, que se convirtió na primer norma que regulaba l’usu del asturianu y qu’anguaño sigue vixente.

Contador Estadistiques