Xuníes Podemos presenta una propuesta de resolución nel Congresu en defensa de les llingües y pola oficialidá

Nel Plenu pol 'Debate de Política General sobre el Estado de la Nación' del 2022.

Ente les quince propuestes de resolución presentaes pol grupu parllamentariu confederal Xuníes Podemos-En Comú Podem-Galicia en Común, el máximu posible, inclúise una de 'Defensa de les llingües del Estáu'. Ésta rexistra ente los sos encamientos, nel puntu 2, "favorecer los procesos de reconocimientu de la oficialidá del asturianu y gallego-asturiano, asina como acompañar el procesu de reconocimientu del aragonés".

Tamién, ensin referencia direuta, el 3 tien que ver coles nueses llingües, al pidir "que se reconozan les especialidaes docentes de les llingües propies del Estáu que, anque nun tean reconocíes como llingües oficiales, cuenten con reconocimientu y proteición llegal nes comunidaes autónomes correspondientes", xunto col blindaxe de los derechos de los profesores. Los otros trés puntos céntrense na defensa de los idiomes, el cumplimientu de les lleis y la promoción del conocimientu de la realidá plurillingüística del Estáu; y l'emplegu de RTVE pa esto último.

La votación d'esta propuesta de resolución va facese esta tarde na xornada última del alderique de política xeneral que se ta celebrando nel Congresu. En total, los diferentes grupos parllamentarios rexistraron 138 propuestes.