El PSOE y Foro voten en contra de la propuesta de resolución de Xuníes Podemos sobre les llingües y pola oficialidá

Con una enmienda d’ERC-Sobiranistes votóse nel Congresu, ensin ésitu, la propuesta de resolución de Xuníes Podemos de ‘Defensa de les llingües del Estáu’ qu’encamentaba al Gobiernu a favorecer los procesos pa oficializar l’asturianu y el gallego-asturiano. El PSOE y el diputáu de Foro, Isidro Martínez Oblanca, posicionáronse en contra.

Los cuatro parllamentarios asturianos d’estes dos formaciones que negociaron la reforma del Estatutu dixeron non a la propuesta que nel so puntu 2 llamaba a “favorecer los procesos de reconocimientu de la oficialidá del asturianu y gallego-asturiano, asina como acompañar el procesu de reconocimientu del aragonés”. Tamién nel 3 marcaba la creación de la especialidá docente.

Les modificaciones propuestes polos nacionalistes catalanes incoporaba nel 1 el testu “y les reconocíes estatutariamente nes sos comunidaes autónomes” a la frase “defender les llingües propies del Estáu” y sumaba un quintu nel que se pidía la modificación del artículu 55.1 del Tratáu de la Xunión Europa (XE) pa que les llingües oficiales apaecieran “na rellación de llingües redautaes” y una posterior solicitú al Conseyu de la XE pal “reconocimientu de la oficialidá d’estes llingües a la Xunión Europea y a la consecuente incorporación al réxime llingüísticu de les instituciones de la Xunión”. La xustificación de la enmienda, aceptada pol grupu parllamentariu confederal Xuníes Podemos-En Comú Podem-Galicia en Común, basábase en “meyorar el reconocimientu de les oficiales y de les reconocíes estatutariamente nes comunidaes autónomes”.

Na votación Xuníes Podemos tuvo l’apoyu d’ERC-Sobiranistes, EAJ-PNV, PDeCAT, JxCat-JUNTS (Junts), Más País-EQUO, CUP-Per la Ruptura, Compromís-Mes Compromís, BNG y Teruel Existe, un total de 66 votos polos 272 en contra de formaciones con diputaos asturianos como’l PSOE, Foro, PP y VOX. Hebo 8 astenciones, les d’EH Bildu y Coalición Canarias-Nueva Canarias-PNC, y la de la parllamentaria de VOX por Almería, Mercedes Jara.

3 de 15 aprobaes

De les 15 resoluciones presentaes pol grupu que tien como representante asturiana a Sofía Fernández Castañón salieron alantre un total de 3 gracies al apoyu del PSOE: la de ‘Defensa de la educación pública en toles sos etapes y el principiu de redistribución nel sistema de beques y ayudes al estudiu’, la de ‘Reconocimientu de la cultura como derechu humanu, asina como l’impulsu de la igualdá y plurinacionalidá nel ámbitu de la cultura’ que marcaba nel so puntu 3 “impulsar la participación de toles llingües del Estáu, oficiales y propies, na programación y la oferta formativa del Instituto Cervantes”, y la entitulada ‘Estáu feminista’.