Xuan María Acebal va ser recordáu n’Uviéu con motivu del 125 aniversariu de la so muerte

En febreru del 1895 finaba a los 79 años n’Uviéu, la ciudá que lu viera nacer, Xuan María Acebal y Gutiérrez, figura destacada de la lliteratura asturiana. Con motivu del 125 aniversariu de la so muerte, Uviéu va acoyer esti vienres un actu d’homenaxe nel cementeriu de San Salvador y un recital poéticu sobre la so obra.

Un grupu de particulares ta tres esta iniciativa que pretende recordar al ‘Príncipe de los poetes bables’, como foi consideráu pol so rigor llingüísticu y altor lliterariu. La so producción, asoleyada en parte na prensa asturiana, inclúi poemes como ‘A María Inmaculada’, ‘La Fonte de Fascura’, ‘Arreglu de cuentes’, ‘A so maxestá Doña Sabel Segunda y al so fíu el Príncipe d’Asturies’ o ‘Cantar y más cantar’, “consideráu pola crítica como ‘el primer poema nacional asturianu’”, apunten los entamadores del actu de mañana.

La so obra, sicasí, nun taría recoyida nun llibru hasta’l 1925, cuando Enrique García Rendueles inxerta en ‘Los nuevos bablistas’ seis poemes de so y dos traducciones d’Horacio. Acebal destacó na so dómina “pola modernidá de la so producción poética, tanto no que cinca a la temática como al estilu”, espresen sobre l’autor, que tamién escribió en castellanu y italianu.

Políticamente foi Acebal un tradicionalista acérrimu, siempre apegáu a la relixosidá y militante del carlismu, polo que, nel 1873, tuvo que s’esiliar en Francia cuandu la última carlistada. Precisamente el xenru d’Acebal, Guillermo Estrada, foi xefe políticu de los carlistes n’Asturies y caltuvo siempre col suegru una gran amistá, hasta’l puntu de qu’Acebal fixera con Estrada el viaxe de novios a Roma, por empara de la so fía.

El cementeriu de San Salvador va acoyer el primer de los actos previstos mañana a les 18 hores, nel que dellos intelectuales van razonar sobre la significación y importancia del legáu cultural de Xuan María Acebal. Darréu, a les 20 hores, la Taberna El Molinón (Águila, 13) va acoyer un recital poéticu sobre la obra del uvieín.

Cinco poemes pa consultar

El Proyectu Caveda y Nava d’Araz –empresa editora d’Asturies.com– permite consultar la biografía d’Acebal, asina como dalgunos de los sos poemes. En concreto, ufre cinco nel perfil dedicáu al autor que mañana recibe l’homenaxe de la sociedá civil.