Xuan María Acebal tendrá cai y placa n’Uviéu

El conceyal d’Interior, Iván Álvarez López, confirmó que Xuan María Acebal tendrá una cai na ciudá y una placa na so casa de nacencia. Iniciativa pol Asturianu solicitara al Conceyu d’Uviéu esti xestu pa recordar la figura d’ún de los escritores más importantes de la nuesa lliteratura.

L’edil d’Izquierda Xunida aconceyó ayeri, en compañía de Víctor Suárez, responsable de Política Llinguística de la coalición, con Javier Cubero, qu’acudió a la reunión en nome d’Iniciativa pol Asturianu y del Atenéu Cultural Xuan María Acebal. Tres la mesma, Álvarez López señaló que’l procesu de colocar la placa na casa onde nació nel 1815 l’escritor “ta  ellaborándose xunto cola conceyalía d’Infraestructures y ha de tener en cuenta al propietariu del edificiu y a la comunidá de vecinos”.

El pasu siguiente será dar una cai a Acebal, consideráu l’introductor de la llírica na poesía n’asturianu y  “ún de los máximos esponentes d’esti xéneru na lliteratura asturiana”, según destaquen d’IX d’Uviéu. Iniciativa pol Asturianu ve asina correspondíu’l so pidimientu al equipu de gobiernu y a los grupos municipales del Conceyu d’Uviéu una selmana depués de treslladalu.

Na semeya, Suárez, Álvarez López y Cubero.