Iniciativa pol Asturianu solicita al Conceyu d'Uviéu una cai pa Xuan María Acebal

L'escritor uviedín Xuan María Acebal merez un homenaxe na ciudá que lu vio nacer nel 1815 y morrer nel 1895. Asina lo considera Iniciativa pol Asturianu, que ta acabante de solicitar al Conceyu una cai n'alcordanza a ún de los meyores creadores de la nuesa lliteratura.

Tanto l'alcaldía como tolos grupos municipales tienen enriba de la mesa esta propuesta pa bautizar col nome del nomáu na so dómina 'Príncipe de los poetes asturianos' una cai nueva d'Uviéu cola fin de recordar la so figura y trayeutoria. Acebal introduxo la llírica na poesía asturiana, "lo que representó una innovación d’especial significación na perspectiva autor-receptor al favorecer la espresión abierta de los sentimientos", espliquen dende la organización.

"Per otru llau ye’l primer escritor que supera un llocalismu que nun trespasaba enxamás les llendes del conceyu, pa cantar a Asturies como una unidá comunitaria dende’l monte Aramu hasta la mariña", recuerda Iniciativa pol Asturianu, al igual que destaca que "nos sos llabores creativos tamién reclamaría la universalidá intelectual del canon grecorromanu coles sos traducciones d’Horacio". Tampoco nun escaez "que collaboró col sacerdote Manuel Fernández de Castro, otru destacáu pioneru de la normalización social y normativización lliteraria, na traducción del Evanxeliu según San Matéu".

Un exemplu de la so trescendencia ye que'l premiu lliterariu añal de la Conseyería d'Educación y Cultura dedicáu a la poesía lleva'l so nome. "Na Asturies d’anguaño, nun difícil tiempu de cambiu, la memoria acebaliana inda tien una función na necesaria articulación d’un nuevu discursu identitariu que nos permita avanzar na reconstrucción de la nuesa autoestima como colectividá, y n'especial na recuperación del prestixu del idioma nel qu'Acebal destacó como un gran escritor", aseguren los impulsores d'esta solicitú al Conceyu d'Uviéu.