Xixón prohibe los circos con animales

La propuesta d'ANADEL, llevada a Plenu por PSOE y IX, salió alantre cola oposición única del PP. Los propietarios de los circos amenacen con denuncies por esta midida al considerala illegal.

Xixón sigue asina'l camín de casi dos centenares de municipios nel Estáu y d'otros nel país, como Mieres, Gozón, Corvera o Castrillón, en mostrase en contra de los espectáculos circenses con animales y en prohibir la so instalación nes sos llendes, yá sía en terrenos públicos o privaos. Foro, Xixón Sí Puede y Ciudadanos apoyaron la propuesta de l'Asociación Nacional Animales con Derechos y Libertad (ANADEL) llevada a Plenu por PSOE y IX, siendo'l PP l'únicu grupu en votar en contra.

L'edil popular Mariano Marín criticó la postura de "prohibir por prohibir" y reseñó qu'esiste una normativa a nivel estatal que protexe a los animales. Nuria Rodríguez López, conceyala de Xixón Sí Puede, entrugó-y na so intenvención si "vustedes nun entienden que la defensa de los animales nun tien color políticu", al empar que recordaba l'esistencia nel Congresu de parllamentarios populares que participen nuna asociación de diputaos favoratibles a la defensa de los animales.

D'igual forma, echó en cara al grupu municipal socialista qu'apoyara la propuesta d'ANADEL y que nun se posicionara en contra de la Feria de Begoña. "Tienen una gravísima contradicción nesti tema", afirmó.

El PSOE, mentes, centróse en denunciar que los circos se salten la normativa con respeuto a los animales y IX nes condiciones nes que tán, zarraos en xaules, y los castigos a los que se-yos somete nel so procesu d'ensayamientu. L'aprobación d'esta propuesta obligará, otra manera, a camudar la ordenanza municipal de proteición d'animales.

Circos Reunidos amenaza con llevar l'asuntu a los tribunales

Ana Braña, conceyala de Facienda, Organización Municipal y Emplegu, amosó l'apoyu a la midida, anque recordó la dificultá pa impidir la presencia de circos con animales cuando éstos faigan usos de terrenos privaos. Pela so parte, l'alcaldesa Carmen Moriyón comunicó la protesta de l'Asociación Circos Reunidos por esta midida, que nuna carta amenazada unviada al Conceyu amenaza a la corporación a llevar l'asuntu a los tribunales por prevaricación.

Semeya de Chensiyuan baxo les llicencies GNU Free Documentation License y Creative Commons.