Xixón acueye un actu n’alcordanza de Yolanda González Huergo “pa mirar alantre, al futuru”

“Nun ye un actu pa mirar atrás”, espresa Rubén Ardura, compañeru de Yolanda González Huergo, que va recibir un merecíu homenaxe de la sociedá asturiana esti domingu nel Muséu del Pueblu d’Asturies baxo la organización de la Xunta pola Defensa de la Llingua Asturiana (XDLA), de la que yera militante. Música, pallabres y compromisu p’axuntar xente baxo un mesmu paragües, “que ye lo que facía Yolanda”.

“El lema escoyíu pal cartelu dizlo too: ‘la grana azul del futuru. Y la flor de l’alcordanza’”, esplica Ardura; un cachu del tema ‘Tierra’ de Felpeyu, grupu que va encargase d’abrir l’actu a les 12.30 hores. “La música foi importante na vida de Yolanda”, y tanto’l grupu folk como L-R, que va pesllar la xornada, “formen parte de la so banda sonora”.

Llueu del conciertu de Felpeyu va dase pasu a les intervenciones, “que se van centrar no que significaben les causes nos qu’ella trabayaba y s’implicaba”. La reivindicación llingüística, los derechos humanos y la militancia política dende l’asturianismu, poro, van tar presentes.

Leticia Baselgas y Rubén Bada, esto ye, L-R, van poner el ramu a esti homenaxe públicu con final previstu pa ente les 14.30 y 15 hores, pa siguir con una xinta, yá de calter priváu. Un reconocimientu que llega un añu y dos meses depués de la so marcha llueu d’una llarga llucha cola enfermedá que nun-y impidió siguir col so compromisu militante y col so llabor como vocera de Podemos-EQUO nel Conceyu, cola aprobación del Plan de Normalización Llíngüística de Xixón 2020-2023 como’l so últimu llegáu.

La situación sanitaria pola pandemia impidió que se pudiera facer enantes esta iniciativa de la XDLA “col valor que tien axuntar xente, que ye lo que facía Yolanda”. “Nun ye un actu pa mirar atrás, sinón pa mirar alantre, al futuru”, sigue Ardura, consciente de la gran buelga dexada por Yoli y la importancia d’esparder el valor de les causes que defendió.