Felpeyu y L-R van tar presentes nel homenaxe a Yolanda Huergo

Música y compromisu. Son los dos aspeutos sobre los que va xirar l’homenaxe a Yolanda González Huergo que la Xunta pola Defensa de la Llingua Asturiana (XDLA) prepara n’alcordanza a la militante asturianista’l domingu 26 nel Muséu del Pueblu d’Asturies, cita na que ta confirmada la presencia de les bandes Felpeyu y L-R.

Yá toma forma la xornada pa recordar a una figura importante nel movimientu de reivindicación llingüística y na política asturiana, una cita que nun se pudo celebrar hasta agora por mor de les restricciones pola pandemia de COVID-19. Ésta va principiar finalmente a les 12.30 hores y va contar con conciertos y intervenciones de persones que conocieron a Yoli y el so compromisu social y políticu.

Voces que van falar “d'aquello no que Yolanda invirtió munches hores, el compromisu coles coses nes que creía. Va falase de tol trabayu de Yolanda lluchando pola diginidá y oficialidá de la llingua asturiana, pero tamién del so llabor en defensa de los derechos humanos cuando militó n’Amnistia Internacional, o la xera en distintes organizaciones polítiques que la llevó nos últimos años a ser conceyal nel Ayuntamientu de Xixón por Podemos Asturies”, avancen dende la XDLA.

La música del país que tanto sintió nun va faltar na cita, cola presencia de “dos de los grupos de los que Yolanda disfrutó munches vegaes”, Felpeyu y L-R. “Va ser una mirada señaldosa a lo qu'ella foi, pero tamién una mirada al futuru enllena de tol compromisu qu’amosó Yolanda na so vida”, resume la organización, que convida a tola ciudadanía “a acompañanos esti día n'alcordanza d’esta persona y de tolo que significó y va significar”.