Xeira entama'l primer Premio de Coronacontos en Gallego-asturiano

Los trabayos, de tema llibre y hasta 200 pallabres, pueden unviase hasta'l domingu.

Cola fin de dar salida a la creatividá nestos tiempos de confinamientu por cuenta de la pandemia de COVID-19, Xeira entama'l primer Premio de Coronacontos en Gallego-asturiano. "El coronaconto ten que ser pequeno y en gallego-asturiano, de non máis de 200 palabras. Porque 200 palabras dan pra coronacuntar non pouco...", apunta l'asociación cultural del Eo-Navia.

Un xuráu va decidir el ganador, anque tamién va haber premiu pal que más preste al públicu. Xeira va colgar los trabayos presentaos, ensin citar el nome del autor, na so páxina en Facebook y el que nás 'Gústame' reciba va llevar esti gallardón.

El llibru 'Máis lletras novas' editáu por Xeira y 'El trato' de Francisco F. Arias Campoamor, mel de Bual de La Cantina, les 'Versióis eonaviegas' de Dixebra, un llote de productos d'El Viejo Pescador, de cerveza artesanal Naviega y de la quesería Abredo, y el DVD conmemorativu del XXX Aniversario de la Noite Celta de Porcía conformen los premios. Les persones que quieran participar nesti concursu de cuentos na llingua del occidente del país tienen hasta'l domingu pa unvialos, xunto con datos de contautu, a la direición de corréu electrónicu coronacontos@gmail.com.