Xeira acusa a sectores del asturianismu d'afalar el galleguismu

Dempués de que'l pasáu llunes les organizaciones Xunta Pola Defensa de la Llingua Asturiana y la mesma Xeira esplicaren los motivos que les llevaren a nun participar na convocatoria de la "Escuela Fermín Penzol", que va celebrase en Ribadeo esti fin de selmana, la organización de defensa de la fala del occidente d'Asturies dio un pasu más allá y nun comunicáu de prensa distribuyíu ayeri esplica, baxo'l títulu xenéricu "Sóbrannos as razois" la so posición na situación que se vive nel conflictu llingüísticu del Navia Eo.

Si Xeira y la Xunta refugaron el dir a Ribadeo porque víen nello un movimientu orquestáu dende Galicia pa defender la galleguidá idiomática y cultural del Navia-Eo, Xeira ve amás axentes que, dende dientro d'Asturies, defenden les tesis que vienen dende la oriella occidental de la Ría del Eo. En concreto, l'asociación que preside Xabiel G. Menéndez truñe abiertamente contra "un sector del asturianismo comandao pol periódico Les Noticies que respalda y alenta as aspiracióis del espansionismo gallego d'estos últimos tempos".

Anque aceptó de mano'l dir a Ribadeo pa esponer claramente "el que llevamos defendendo dende hai xa quince anos" sobre la "especificidá que ye proporciona al gallego-asturiano el feito d'actuar de nexo d'unión natural y progresivo entre el asturiano y el gallego" y "a concencia dos falantes da sua individualidá llingüística" amás de remachar el fechu de que les competencies llingüístiques sobre la zona son esclusivamente de les autoridaes asturianes, Xeira refugó la so asistencia a Ribadeo y sorraya dellos argumentos que yá espunxere'l llunes colos representantes de la Xunta pola Defensa de la Llingua referentes al desalcuerdu xeneral col diseñu y programa de les xornaes a desarrollar en Ribadeo, que ve lloñe de la intención declarada d'entamar "pontes de diálogo" ente Asturies y esplica que mientres hai ausencies "clamorosas" citando la de l'Academia de la Llingua Asturiana, que tien a un académicu especialista de la zona na persona de José Antonio Fernández Vior, pela parte de Galicia tán convidaos "non sólo representantes da RAG, entre os que figuran os académicos del que se pretende "gallego limítrofe" noutras comunidades como Zamora (Felipe Lubián) y Asturias (Carlos Varela), sinón tamén da Universidá, da Secretaría Xeral de Política Lingüística, del Servicio de Normalización Lingüística, y del asociacionismo".

Otramiente, Xeira amuesa'l so disgustu énte'l fechu de que "coincidindo cua convocatoria da Escola, publícase el editorial del semanario Les Noticies, unde se pide a oficialidá del gallego en Asturias, escrito del que se fixeron eco os periódicos gallegos al tempo qu'anunciaban el acto que s'iba fer en Ribadeo". Ello lleva a Xeira a ver en Les Noticies un cómpliz de la "maniobra gallega" y diz que "Nun hai qu'esqueicer qu'a conferencia titulada Historia de dos hermanes y un llobu malu, d'un co-responsable d'este editorial, abre a primeira xornada da Escola". Pa Xeira ye "especialmente doloroso ver cómo un sector asturiano, por nun se sabe qué mouros intereses, nos vende d'este xeito".

Xeira resume la situación considerando "inaceptable cualquer iniciativa que, sala d'unde sala, contemple y día esfouto al interés de Galicia por impoñer a llingua gallega nun territorio que nun é de sou" y remacha apuntando que "Nun falamos gallego, Galicia nun ten nada que dicir, y non sólo porque esto sía administrativamente outra comunidá. El futuro da llingua que se fala nel Navia-Eo decídenlo os sous falantes a través das súas asociacióis, y das súas institucióis académicas y políticas".