Xaime Martínez gana'l 'Premio Nacional de Poesía Joven'

L'escritor uvieín algama esti reconocimientu por 'Cuerpos perdidos en las morgues. Una novela de detectives'. La so obra n'asturianu tendría complicao a aspirar al mesmu.

El xuráu del 'Premio Nacional de Poesía Joven Miguel Hernández', qu'entrega'l Ministeriu de Cultura y Deporte, propunxo a Xaime Martínez pa la edición del 2019 pola so obra 'Cuerpos perdidos en las morgues. Una novela de detectives'. Decidieronse pol trabayu del músicu y escritor "pola intelixencia poética manifiesta nel usu ficcional de la poesía, asina como una capacidá estelante pa proponer una llectura innovadora del poema. La concepción del llibru como arquiteutura poética y el so apueste pola tradición de la rotura combínase con un humor atrevíu y sorprendente”.

El gallardón cuenta con una recompensa de 20.000 euros y a la mesma Martínez tendría mui difícil poder aspirar cola so producción n'asturianu, únicu idioma que trabaya anguaño l'autor de 'Hibernia' y del discu-llibru ‘Ósculos d’agua nel Imperiu Asturianu’ –editáu por Araz, empresa editora d'Asturies.com– . El fechu de que'l ministeriu nun convide a l'Academia de la Llingua Asturiana a formar parte del xuráu d'ésti y de los otros premios lliterarios 'nacionales', como fai col restu d'academies de les otres llingües del Estáu, complica muncho que los escritores asturianos en llingua asturiana puedan optar a ellos, yá que son los miembros del xuráu los que presenten candidatos.

Nesta ocasión, amás de la Real Academia Española, la Real Academia Galega, la Euskaltzaindia y l'Institut d’Estudis Catalans, tuvieron representante l'Asociación Colegial de Escritores (ACE), l'Asociación Española de Críticos Literarios, la Federación de Asociaciones de Periodistas de España (FAPE), la Conferencia de Rectores de las Universidades Españolas (CRUE), el Centro de Estudios de Género de la UNED y el propiu ministeriu. Completó'l xuráu Berta García Faet, autora galardonada nel añu 2018.