Wenceslao López cesa al xefe de la Policía Llocal por “perda de confianza”

José Manuel López García, xefe de la Policía Llocal d'Uviéu investigáu pola operación ‘Enredadera’ entamada'l martes pola UDEF por amaños de contratos públicos pa regular el tráficu, pierde’l so cargu. L’alcalde Francisco Wenceslao López decidió cesalu “por perda de confianza” tres “una fonda y tranquila reflexón”.

Esta mañana’l primer edil convocó a los medios con urxencia pa dar anuncia d’esta midida que llega “non sólo pol fechu últimu, sinón porque tresvirtió’l vaso por diferentes fechos que se produxeron, escosando la mio confianza nél", apuntó. El socialista darréu puntualizó que “ye por dellos fechos que se produxeron nestos años últimos”.

Tamién citó factores como la “falta de confianza y cierto descontrol n’árees de serviciu, a lo llargo del tiempu” y “dificultades y resistencies” pa “cumplir órdenes, poniendo oxeciones a asuntos como, por exemplu, un cursu de los policíes nuevos. Son fechos que s’acumulen y que dañen de manera nidia al coleutivu y eso yá nun puedo permitilo”. Luis Manuel García Pena, xefe de la División Operativa de la Policía Llocal, va ocupar el cargu de López García de forma temporal hasta que se convoque la plaza.