La UDEF rexistra’l Conceyu d’Uviéu dientro d’una operación policial en decenes d’ayuntamientos por amañu de contratos

La mañana del martes foi de muncha actividá nel Ayuntamientu d’Uviéu. Axentes de la Unidad de Delincuencia Económica y Fiscal (UDEF) de la Policía personáronse na Casa Conceyu y na sede de la Policía Llocal pa facer un rexistru dientro d’una operación contra l’amañu d’axudicaciones públiques pa regular el tráficu.

Al rodiu de les 9 hores llegaron los policíes xudiciales tanto a la Casa Conceyu como al cuartel del Rubín. El motivu yera proceder a un rexistru dientro d’una investigación a unos 40 ayuntamientos de tol Estáu sobre posibles amaños na contratación pública de servicios pa la regulación del tráficu que favoreceríen a una filial de la empresa Sacyr, Aplicaciones Gespol.

Roberto Sánchez Ramos ‘Rivi’, conceyal de Cultura, y Ricardo Fernández Rodríguez, de Seguridá Ciudadana, acompañaron a los axentes nos rexistros nes dos dependencies, de manera respeutiva. L’edil d’Izquierda Xunida (IX) aseguró que dende’l gobiernu municipal esiste tranquilidá pese a  la situación, lo que da entender que, nel casu d’esistir irregularidá, la responsabilidá sería del equipu anterior, del Partido Popular (PP), o de los xefes de la Policía Llocal.

Uviéu ye la única ciudá asturiana qu’apaez na llista de poblaciones investigaes, na qu’apaecen Uesca, Lleida, Lleón, Palencia o Teruel, ente otres munches. Los axentes tiene orde de detención d’unes 40 persones, ente los que ta un alcalde de Ciudadanos, el del pueblu madrilanu d’Arroyomolinos, no que sería’l primer casu de corrupción del partíu naranxa.