Volotea va poner a la venta billetes con Alemaña en dos selmanes

|

Asturies va tar coneutada con Bayern dende xunu, ampliando les conexones internacionales del aeropuertu asturianu a seis estaos, anque sólo trés mientres tol añu. Volotea, compañía que va trabayar esta llinia, va poner a la venta los billetes en quince díes.

Asina, amás de cola ciudá bávara de Minga/München, los asturianos y asturianes van poder volar dende'l país a Reinu Xuníu, Francia, Portugal, Italia, Suiza y Alemaña, los trés primeros a lo llargo de tol añu. Francisco Blanco, conseyeru d’Emplegu, Industria y Turismu, destacó que la conexón nueva favorecerá los desplazamientos al centru d’Europa por motivos de trabayu, asina como la llegada de turistes alemanes a Asturies.

Esti branu Asturies contó con 21 conexones direutes, siete a aeropuertos internacionales (trés de Londres, París, Venessia, Genèva y Lisboa) y catorce a destinos estatales (Alacant, Barcelona, Fuerteventura, Gran Canaria, Eivissa, Lanzarote, Madrid, Málaga, Menorca, Palma de Mallorca, Sevilla, dos de Tenerife y València). Otra manera, les frecuencies al aeropuertu Charles de Gaulle (París) van pasar de dos a trés selmanales nel últimu trimestre d’esti añu.

Contador Estadistiques