Asturies promociónase n’Alemaña aprovechando l’apertura de la ruta aérea de Volotea en mayu

Minga/München acoyó esti miércoles la presentación n’Alemaña de la ruta que va xunir esti país con Asturies a partir del 26 de mayu. Volotea yá tien a la venta billetes pa esta conexón, con salides los martes y los vienres, cola que’l Gobiernu pretende atrayer turismu.

Francisco Blanco, conseyeru d’Emplegu, Industria destacó, énte una ventena de medios de comunicación alemanes, qu'Asturies “ufierta un productu diferente y de calidá, basáu en recursos naturales y culturales, sobre'l que construyir una ufierta d'acordies colos nuevos enclinos del mercáu: el turismu d'aventura y d'esperiencia”. Ente otros atractivos del páis pal mercáu alemán, citó'l so paisaxe, que señaló ideal pa la práutica del turismu activu y con espacios naturales declaraos reserva de la Biosfera pola UNESCO, mesmo que’l Prerrománicu y la ufierta gastronómica.

“La conexón aérea nueva tien una importancia estratéxica y tamién va facilitar los desplazamientos por razones de negocios a otros sectores económicos asturianos”, sorrayó'l darréu. Alemaña foi nel 2015 el segundu mercáu internacional n'importancia p'Asturies por númberu de turistes, el terceru n’agospios y el cuartu nel ranking de los diez primeros países a los qu'esportaron les empreses del país.

El conseyeru tuvo acompañáu nel actu pol direutor xeneral de Comerciu y Turismu, Julio González Zapico; el direutor de Tráficu y Desarrollu del Aeropuertu Minga/München, Ulrich Theis; el responsable de la Oficina Española de Turismo d'esta ciudá alemana, Álvaro Blanco Volmer; y el direutor de Desarrollu Internacional de Volotea, Edo Friart. Con esta ruta, Asturies pasa a tar comunicada con seis ciudaes europees, yá que se suma a les esistentes con Londres, París, Lisboa y Genèva, y la próxima con Venessia.

Na semaya, Theis, Friart, Blanco, Blanco Volmer y González Zapico.