Vilanova celebra'l Vía Crucis Viviente

Ye ún de los munchos festexos relixosos, gastronómicos o d'ociu que s'entamen nel país estos díes de Selmana Santa.

El Vía Crucis Viviente de Vilanova d'Ozcos, declaráu l'añu pasáu Fiesta d'Interés Turísticu, celébrase tolos Xueves Santu al rodiu del Monasteriu de Santa María. Trátase d'una representación popular de la Pasión según San Marcos, cola participación y collaboración d'un gran númberu de vecinos y vecines, con salida a les 19 hores.

Esta celebración ye una de les munchos eventos relixosos y procesiones que se celebren n'Asturies estos díes en poblaciones como Villaviciosa, Ḷḷuarca, Xixón, Avilés, Uviéu, L'Infiestu, Llanes o Cangues d'Onís. Sicasí, non too xira al rodiu la relixón, y estos díes el país tamién va ser testigu d'una bayura importante d'actividaes gastronómiques y d'ociu.

Asina, en Xixón va poder disfrutase de la VIII Primer Sidre l'Añu, La Gran Mariscada o'l Juguetea Family Festival; n'Uviéu, los 'Bocados del Cofrade'; en Villaviciosa, el V 'Certamen de Azabachería Eliseo Nicolás'; en Candás, el V 'Festival del Pulpo'; en Lluanco, el XXX Festival de la Marañuela; en Grandas de Salime, el III 'Concurso de Tapas'; en Tapia, el XVIII 'Festival del Mejillón y el Marisco'; y en Muros, les XXXI 'Jornadas Gastronómicas del Pixín', ente otros munchos.