Villaviciosa divulga l'acebache col certame Eliseo Nicolás

|
Trabayu d'acebache

Una esposición na Casa de los Hevia va tar reforciada por talleres p'adultos y la reciella, y una feria monográfica na plaza'l Güevu.

El V 'Certamen de Azabachería Eliseo Nicolás', entamáu pola Asociación Acebache en collaboración col Conceyu de Villaviciosa, va desendolcase dende mañana y hasta'l domingu, con accesu de baldre a la muestra de 10.30 a 14 y de 17 a 20.30 hores. Trátase d'una esposición de divulgación cultural del oficiu acebacheru, únicu n'Asturies onde conflúin trabayos de profesionales antiguos, actuales y aprendices. 

Éstos van poder participar nel concursu del certame, que va repartir premios de reconocimientu a los meyores trabayos en dos categoríes: aprendices y profesionales. El fallu del mesmu va producise'l vienres a les 13 hores.

Alredor de la esposición tamién van entamase una serie d'actividaes complementaries a la eeposición, como talleres educativos p'adultos a diariu, asina como infantiles. Éstos últimos van tener llugar ente mañana y el sábadu n'horariu de 19 a 20.

Otra manera, de manera paralela al certame d'acebechería va entamase una feria monográfica sobre esti material na plaza'l Güevu ente'l xueves y el domingu.

Contador Estadistiques