Ventisiete candidatures presentaes al XXXII Premiu al Pueblu Exemplar d'Asturies

Quieren relevar a Somáu nel gallardón.

Ayeri peslló'l plazu de presentación de candidatures XXXII Premiu al Pueblu Exemplar d'Asturies, al qu'esti añu opten ventisiete candidatures, una más que na edición del 2020. La Fundación Princesa de Asturias convoca esta inicitiva, que cuenta con bases espublizaes nes trés llingües falaes nel país y respeta la toponimia oficial.

La rellación d'aspirantes confórmenlo Ribeseya; Trapa, La Vega y El Carme (Llangréu); l'Asociación de Vecinos San Jorge de Santurio (Xixón); la Cofradía de Pescadores de Santa Ana (Llanes); Cuaña, una biblioteca de valores; Llugones (Siero); territoriu del ríu Seya; la comunidá vecinal de San Cucao (Llanera); Peḷḷuno (Ayer); Suarías (El Valle Baḥu de Peñamellera); vecinos d'Arroes (Villaviciosa); Asociación Vecinal Ríu Fontoria (Piloña); la comunidá cultural, deportiva y paisaxista de Navia; Coviella (Cangues d'Onís); Posada (Llanes); Pezós; Villoria (Llaviana); Murieḷḷos (Riosa); Llaviana (Gozón); comunidá vecinal de Casu; xente de la villa de Salas; El Puertu (Somiedu); Fitoria y la so Sociedad Festivo-Cultural San Antonio de Fitoria-Villamejil (Uviéu); Valdesoto (Siero); Valle del Samuño (Llangréu); Banduxu (Proaza); y la comunidá vecinal de Cadavéu, Viḷḷamouros y Ribón (Valdés). El 2 de setiembre ta convocáu'l xuráu que decidir quién merez el gallardón.

El Premiu al Pueblu Exemplar d'Asturies, con una recompensa de 25.000 euros, busca reconocer al "pueblu, aldea, nucleu de población, espaciu paisaxísticu o grupu humanu del Principáu d'Asturies que rescamplara de mou notable na defensa y conservación del so entornu natural, ambiental, del so patrimoniu históricu, cultural o artísticu, n'iniciatives d'impulsu económicu y social o na realización d'obras comunales o otres manifestaciones de solidaridá sobresalientes”.

Na semeya, placa instalada en Somáu pol gallardón del añu pasáu. Ésta lleva'l nome 'Somao' al nun tar entá oficializada la toponimia de Pravia nesi momentu, siendo la forma derogada 'Somado'.