Somao, Pueblu Exemplar d'Asturies del añu 2020

Ventiséis candidatures optaben al gallardón.

Somao releva a Asiegu como Pueblu Exemplar d'Asturies. Esta parroquia rural del Baxu Nalón con 300 habitantes ye una de les 39 esistentes n'Asturies con personalidá xurídica propia y con capacidá pa xestionar y organizar los sos bienes, ente los que tán 400 hectárees de monte y dellos pastos que son una fonte importante d'ingresos pal pueblu.

"Los habitantes de Somao supieron caltener la riqueza del so legáu patrimonial indianu y rural al traviés de llazos de collaboración vecinal estrechos nuna apuesta convencida y exemplar pola xunión de tradición y modernidá. La disposición al diálogu y el entendimientu, amosada polos sos habitantes nos años últimos en favor del bien común, el fuerte espíritu emprendedor de los sos mozos, y la so capacidá de xestión y organización de los bienes de la parroquia rural, integraos por montes y pastos –con ingresos que van en beneficiu del pueblu–, contribuyeron col so esfuerciu a ameyorar l'actividá económica al traviés del sector agroalimentariu y el turismu y a afianzar la so sólida apuesta pol futuru", apunta l'acta del xuráu convocáu pola Fundación Princesa de Asturias.

El premiu, con un recompensa de 25.000 euros, entregaráse'l 17 d'ochobre, un día depués de la ceremonia de los Premios Princesa de Asturias nel Teatru Campoamor, actos que tarán marcaos pola situación sanitaria del momentu pola pandemia de COVID-19.

Respetu a la toponimia

El Premiu al Pueblu Exemplar d'Asturies vien espublizando les sos bases nes trés llingües que se falen nel país dende l'añu 2014 y respeta la toponimia tradicional, la oficial. Nesti casu, emplega la forma Somao y non la castellanizada 'Somado' magar que Pravia ye ún de los doce conceyos del país qu'entá nun oficializaron los nomes de llugar asturianos.

Semeya obra de Carmen Morán baxo llicencia CC BY 4.0.