“Vamos ser los protagonistes de la década del cambiu”, dixo Barbón a les conseyeres y conseyeros nuevos

El Salón Europa de la Xunta Xeneral acoyó esti martes la toma de posesión de los diez conseyeros que conformen el Gobiernu nuevu d’Asturies. “Vamos ser los protagonistes de la década del cambiu”, dixo-yos el presidente Adrián Barbón, que pidió al so equipu humildá, cercanía, atrevimientu y amor fondu al país.

El llavianés dirixóse a ellos pa dici-yos que “nun vos quiero zarraos nos vuesos despachos envueltos pola burocracia. Debéis tar a ras de tierra, dispuestos a escuchar les crítiques y necesidaes de la sociedá, porque quiero conseyeros y conseyeres que sepan pisar el barru”.

“Vamos ser los protagonistes de la década del cambiu”, rescampló, sobre manera frente a la “fola involucionista”. “Tenemos que pone-y frenu porque somos un Gobiernu qu’exemplifica la política progresista”, añadió.

Espina, n’asturianu

Les conseyeres y conseyeros prometieron el so cargu toos en castellanu, a esceición de Lydia Espina, responsable tamién nesta llexislatura d’Educación, que lo fixo en llingua castellana primero y n'asturianu darréu. Completen l’Executivu la vicepresidenta Gimena Llamedo, al frente de Presidencia, Retu Demográficu, Igualdá y Turismu; Guillermo Peláez, de Facienda y Fondos Europeos; Borja Sánchez García, de Ciencia, Empreses, Formación y Emplegu; Concepción Saavedra, de Salú; Nieves Roqueñí, de Transición Ecolóxica, Industria y Desendolcu Económicu; Alejandro Calvo, de Fomentu, Cooperación Llocal y Prevención de Quemes; Marcelino Marcos, de Mediu Rural y Política Agraria; Melania Álvarez García, de Derechos Sociales y Bienestar; y Ovidio Zapico, d’Ordenación del Territoriu, Urbanismu, Vivienda y Derechos Ciudadanos.

Mañana va celebrase la primer xunta del Conseyu de Gobiernu de la decimosegunda llexislatura. Va ser a les 10 hores nel Aula del Reinu d'Asturies, en Cangues d'Onís.

Na semeya, Saavedra, Marcos, Zapico, Roqueñí, Llamedo, Barbón, Peláez, Calvo, Sánchez García, Álvarez García y Espina.