“Vamos esperar a lo que pase na Xunta Xeneral cola oficialidá”, asegura Antuña tres l’anulación de la ordenanza d’asturianu

L’alcaldesa de Noreña, Amparo Antuña, nun oculta la so sorpresa pola sentencia del TSXA qu’anula la ordenanza d’asturianu tres l’esfuerciu en modificar l’anterior torgada pol tribunal. Y ye que los argumentos son los mesmos: “diz que vien a declarar la oficialidá nel conceyu”, apunta al tiempu que cree que “ye un tema nel que tien qu’entrar el Principáu”.

La sentencia llegó ayeri al Conceyu, que va dar cuenta de la mesma esta tarde al Plenu depués de que yá s’informara en xunta de gobiernu. El Tribunal Superior de Xusticia d’Asturies (TSXA) atiende’l recursu presentáu por un miembru del PP llocal, formación ensin representación na corporación, y decide anular la ‘Ordenanza Municipal pal Usu de la Llingua Asturiana nel Conceyu de Noreña’, cola circunstancia de que ye la segunda vegada que lo fai.

“Diz que la ordenanza vien a declarar la oficialidá nel conceyu y qu’hai ausencia d’estudiu económicu”, espresa Antuña, que “acata lo que diz el xuez, como ye lóxico”. Sicasí, nun oculta la so sorpresa depués del esfuerciu fechu pola so formación, Independientes por Noreña, y por Conceyu Abiertu por Noreña p’adaptar l’anterior cola ayuda d’un abogáu –procedióse a la modificación de dellos puntos– y la incorporación d’un informe d’Intervención económicu que demanda la llei.

“En nengún momentu pretendimos la oficialidá”, esplica Antuña, “namái que la xente que quiera usar la llingua nativa del conceyu pueda facelo”. Llegáu esti puntu, l’alcaldesa entiende “que correspuende al Principáu ver qué facer; ye un tema nel que tien qu’entrar”, polo que “vamos esperar a lo que pase na Xunta Xeneral cola oficialidá”, reconocimientu llegal que desbloquiaría la ordenanza.

Na semeya, Antuña, acompañada pol edil Pelayo Suárez Colunga, nun aconceyamientu con Barbón en xineru del 2020.