El TSXA anula per segunda ocasión la ordenanza d’asturianu de Noreña

|
Casa Conceyu de Noreña

La denuncia d’un miembru del PP de Noreña, partíu ensin representación nel Plenu, de la segunda ‘Ordenanza Municipal pal Usu de la Llingua Asturiana nel Conceyu de Noreña’ salió finalmente alantre. El Tribunal Superior de Xusticia d’Asturies (TSXA) tornó a valtala.

Nel Plenu de mañana va dase cuenta de los detalles de la sentencia, aprobada n'abril del 2019 pola corporación anterior. Conceyu Abiertu por Noreña foi la so impulsora, contando col sofitu d'Independientes por Noreña (IPÑ) y Foro, colos votos en contra del PP y el PSOE, y l'astención d'Izquierda Xunida (IX).

Nesi mesmu momentu'l PP amenazó con denunciar al igual que na primer ocasión, cuando'l militante Luis Miguel Suárez González dio'l pasu. Naquel momentu la referencia al asturianu como llingua propia del conceyu, lo que’l TSXA consideraba una declaración d’oficialidá, y l’ausencia d’un estudiu d’incidencia económica na Facienda municipal, llevaron a esa decisión xudicial.

Agora'l tribunal toma la decisión d'anulalu otra vuelta magar los cambios efeutaos “pa evitar intepretaciones llibres”, como esplicó l'entós edil de Conceyu Abiertu por Noreña, Antonio Martínez Fernández, a Asturies.com. Dase la circunstancia de que'l PP ye, xunto con Foro, l'únicu partíu de l'anterior corporación que nun algamó representación nes eleiciones del 2019.

Necesidá d'oficialidá

Iniciativa pol Asturianu asoleyó un comunicáu al respeuto de la sentencia del TSXA cola ordenaza, na que reclama la oficialidá "pa iguar situaciones como ésta". “Resulta incomprensible poner el llímite llegal pal idioma na Llei d’Usu ya intentar bloquear cualesquier avance na normalización social del asturianu nos conceyos" apuntó Inaciu Iglesias, ex edil de Noreña y direutivu del coleutivu.

"Tamos ante una situación d’anormalidá llexislativa. Per un llau, la Constitución nel so artículu 3.2 ye mui clara, l’artículu 4 del Estatutu fala de la protección del asturianu y esta ordenanza ta bloquiada cuando s’ampara na propia Llei d’Usu. Esta actitú, ante una ordenanza qu'únicamente garantiza drechos y nun obliga a nada, refuerza la necesidá de la reforma estatutaria pa incluyir la oficialidá del idioma", asegura.

Por útlimo, recuerda "qu’esta ordenanza nun costaba un céntimu al contribuyente nin xeneraba nengún tipu d’obligación nin pal funcionariáu nin pa la ciudadanía".

Contador Estadistiques