Valtaes les propuestes de resolución de Foro presentaes como requisitos pa la reforma del Estatutu

Les resoluciones sobre’l cheque pa naciatos o la reforma fiscal que toca l’impuestu de socesiones, requisitos puestos el martes por Foro p’apoyar la reforma del Estatutu y la oficialidá, asina como la vuelta al conveniu del Plan de Víes de Xixón del 2019 qu’agora Foro Xixón presenta como “irrenunciable”, nun salieron alantre. La FSA opúnxose a les trés.

Esti xueves celebróse la tercer y última sesión del alderique d’orientación política xeneral correspondiente al añu llexislativu 2021-2022. Pela mañana tuvo llugar la defensa de les resoluciones –pa encamentar al Conseyu de Gobiernu– y fixación de posición con respeuto a les de los demás grupos, y, yá pela tarde, la votación de les mesmes, un total de 147: 28 de Podemos, 23 de Ciudadanos, 36 del PP, 23 de Foro, 1 d’IX, 25 de VOX, 10 de la FSA-PSOE y 1 conxunta de Podemos y IX sobre la derogación de la reforma llaboral estatal del 2012.

Ente les presentaes por Foro taben dos que facíen referencia a dalgunos de los requisitos puestos pola formación pa votar ‘sí’ a la reforma del Estatutu presentada pol Gobiernu qu’inclúi la oficialidá, entrambes refugaes. La primera yera sobre l’ayuda direuta de 150 euros mensuales por fíu nacíu, que nesti casu ampliaba “hasta los 18 años” con un horizonte de “5 años prorrogable por periodos socesivos”, que contó namái col sofitu de Ciudadanos y VOX, cola FSA, Podemos y IX votando en contra y l’astención del PP (21 ‘sí’, 26 ‘non’ y 10 astenciones).

Menos sofitos tuvo la que se refería a la reforma fiscal, con VOX como únicu apoyu, l’astención de PP y Ciudadanos y el refugu de FSA, Podemos y IX (4 ‘sí’, 26 ‘non’ y 15 astenciones). Pela so parte, la demanda de la vuelta al conveniu del 2019 del Plan de Víes de Xixón, que Foro Xixón calificó estos díes como daqué “irrenunciable” pa ser el votu 27, contó col refugu de la FSA y IX, mentes que Podemos s’astuvo nesta ocasión xunto con PP y Ciudadanos, con VOX otra vegada amosándose a favor (4 ‘sí’, 22 ‘non’ y 19 astenciones).

Pela mañana'l presidente Adrián Barbón anunciara la decisión tomada ayeri pola Comisión Executiva Autonómica de la FSA de solicitar a Foro les sos demandes per escritu "pa saber qué condicionantes hai, tener los datos y falar tamién sobre eso coles dos formaciones de la izquierda necesaria pa reformar l'Estatutu", esto ye Podemos y IX. Va ser nesi momentu cuando los socialistes esaminen les propuestes de Foro y fixen un posición al respeuto, aseguró.

Sobre l’asturianu

Podemos presentó una resolución referente a “tomar toles midíes necesaries pa garantizar la presencia del asturianu y del gallego-asturianu na programación de la RTPA, con un tratamientu dignu, global y permanente”, que salió alantre colos 26 votos de les trés formaciones que dende un primer momentu vienen sofitando la oficialidá y l’astención d’Adrián Pumares que, precisamente pela mañana, confirmara la so postura favoratible de siempre a la defensa de los derechos llingüísticos, que lu llevaron a la so afiliación a Foro nel 2011. PP, Ciudadanos, VOX y Pedro Leal refugaron la proposición (26 ‘sí’, 18 ‘non’ y 1 astención).

Tamién rexistrara otra pa “dotar a la Radiotelevisión del Principáu d’Asturies del mandatu marcu que permita fixar porcentaxes de programación pal ente públicu”, que nesta ocasión nun s’aprobó. Opunxéronse FSA, IX y VOX, y sofitáronla PP, Ciudadanos y Foro (21 ‘sí’ y 24 ‘non).

Pela so parte, VOX solicitara “la eliminación de la Direición Xeneral de Política Llingüística” y la retirada de toles partíes de los Presupuestos destinaes a polítiques llingüístiques, na que quedaron solos, colos 43 diputaos restantes votando ‘non’.