Pumares da’l sí a la reforma y a la oficialidá con condiciones

“Esto camuda tol alderique”, espresó Adrián Barbón llueu de sentir les condiciones d’Adrián Pumares pa sofitar la reforma del Estatutu y la oficialidá, amosando tamién la so disposición a negociar. Éstes son la voluntariedá y la necesidá de trés quintos p’aprobar la llei que desendolque esa oficialidá, una Llei d’Impulsu Demográficu, ayudes direutes a la natalidá y la bonificación del impuestu de socesiones hasta la cantidá d'un millón d’euros.

“Agora somo nosotros los que tenemos que decidir si vamos a negociar estes condiciones que vusté marcó pa qu’haya o non reforma”, afirmó’l socialista, qu’agradeció’l tener “una propuesta firme” sobre la mesa. “Yo nun puedo decidir por min, tien que ser una decisión de la Comisión Executiva Autonómica del partíu, que tien que s’axuntar y valorar los requisitos que vusté punxo” pa una reforma, añadió, “que significa muncho más. Yá nun ye simplemente ganar n’autonomía política, sinón que tamos falando inclusive d’una reforma fonda venceyada tamién a los Presupuestos del añu 2022, porque van de la mano”.

“Nun tardaremos muncho en dicir cuála ye la nuesa posición, fixaremos la mesma, fadrémosla pública y, poro, entraremos a fondu, o non, na reforma del Estatutu”, finó Barbón la so intervención. Una reflexón que “tamién tendrán que facer Izquierda Xunida y Podemos énte estos requisitos”, apuntara previamente’l socialista, les otres dos formaciones favoratibles a entamar la reforma estatutaria.

Les propuestes

“Señor presidente, toi d’alcuerdu con vusté en que depués de cuarenta años l’Estatutu d’Autonomía pue requerir una gran reforma. Pero Asturies, el Principáu d’Asturies, tamién la necesita. Y por eso dende Foro Asturies proponemos-y nun quedar nel procesu estatutariu; proponemos-y dir más allá y nesta misma llexislatura acometer esa gran reforma que necesita Asturies llueu de cuarenta años de camín que la punxeren a la cola del tren de les comunidaes autónomes d’España”, llanzó Pumares a Barbón nel so turnu d’intervención na segunda sesión del alderique d’orientación política xeneral correspondiente al añu llexislativu 2021-2022.

Nesi momentu apuntó como necesidaes “parar yá la sangría demográfica con una Llei d’Impulsu Demográficu”, col compromisu de que’l Gobiernu garantice ayudes direutes a la natalidá “de 150 euros al mes, por fíu nacíu, y sosteníes nel tiempu pa cubrir les primeres etapes de la vida”; “dexar de tener un sistema fiscal que constitúi un agraviu sangrín coles comunidades del nuesu entornu”, incluyendo la eliminación de facto del "impuestu de socesiones, bonificándolu hasta la llende d'un millón d'euros"; y un compromisu n’infraestructures, con referencia a la rede de cercaníes o la llegada del AVE, ente otres. “Si somos quien a afrontar esa gran reforma, la del Estatutu d’Autonomía nun será más que’l colofón d’un procesu que nos pondrá, esta vegada sí, al altor del restu d’España”, rescampló’l diputáu de Foro.

“Tamién pal Estatutu tenemos propuestes”, siguió, p’algamar un testu “más inclusivu, más abiertu y más actual”, cola intención de llegar al “máximu techu competencial, porque ye lo que queremos p’Asturies dende la nuesa fundación: non más que naide, pero tampoco menos que los demás”. Y pa la oficialidá del asturianu, col requisitu de “la voluntariedá y la non imposición”.

“Garanticemos a tou aquel que desee utilizala –la llingua asturiana– esi derechu; respetemos a tou aquel que nun quiera facelo. Y pa eso, afitemos nel Estatutu d’Autonomía que la llei d’usu que desendolque la cooficialidá esixa pa la so aprobación los trés quintos d’esta Xunta Xeneral que se requieren pa la so declaración, y qu’esa llei respete en tou casu la realidá sociollingüística d’Asturies y el principiu irrenunciable de la voluntariedaá y la non imposición en nenguna esfera de la vida de los asturianos y asturianes; incluyendo, claro, la vehicularidá de la llingua”, espuso al respeuto.