Uviéu potencia la Xira al Naranco tres la esperiencia del añu pasáu

Los Berrones, Tejedor, y Silvidos y Gemidos van poner la música na área recreativa.

El domingu va celebrase la segunda edición d'esta época nueva de la Xira al Naranco, festividá con muncha tradición nel conceyu que se perdió cola Guerra Civil y que se trató de recuperar en delles ocasiones, ensin munchu punxu. La bona esperiencia del añu pasáu lleva al Ayuntamientu a potenciala esti 2018 xunto al coleutivu Manos por el Naranco.

Delles actividaes lleven celebrándose al rodiu d'esta cita mientres la selmana, principal novedá xunto a una carrera al Naranco prevista na mañana de la xira. L'ascensu al área recreativa va comenzar, pa la xente que decida facela a pie, a les 10.30 hores dende La Llosa o la plaza de Gabino Díaz Merchán, siendo tamién posible enganchar la marcha al rodiu les 11 hores dende Samiguel de Lliño, mentes que los que quieran facelo en bicicleta han de tar a les 10.15 hores en Gabino Díaz Merchán.

A les 12.30 hores van comenzar les actividaes cola entrega de trofeos de la Carrera Xira al Naranco, pa la que ye necesario inscribise previamente. Talleres de cometes, xuegos tradicionales, escursiones a los pozos de nieve y a los bunkers, Disc Golf y delles actuaciones folclóriques componen parte del programa.

Cuentos de Milio'l del Nido

Milio'l del Nido va contar cuentos dende l'escenariu central a les 13 hores, mesmu llugar onde va actuar Silvidos y Gemidos a les 14.30 hores. El conciertu de Tejedor ta previstu pa les 16 hores, mentes que'l turnu de Los Berrones, va ser a les 17.15 hores.

La entrega de los premios del concursu de pintura al aire llibre, a les 18.30 hores, va poner el ramu a la xornada.

Na semeya, representantes municipales, de Manos por el Naranco y Sil y Gema Fernández, de Silvidos y Gemidos, nel actu de presentación d'esta edición de la Xira al Naranco.